Presidenti turk ka shfrytëzuar një aktivitet ditën e sotme për t’i bërë thirrje BE-së që të marrë shpejt një vendim mbi pranimin e Turqisë në union.
“Ata paturpësisht thonë se negociatat me Turqinë duhet të rishikohen. Jeni shumë vonë! I rishikoni ato sa më shpejt të jetë e mundur. Por jo vetëm t’i rishikoni, merrni një vendim përfundimtar,” ka thënë Erdogani.
Në vijim, zëdhënësi i presidentit turk, Ibrahim Kallën, e ka paralajmëruar BE-në në lidhje me zërat për pezullimin e procesit të pranimit të Turqisë. Ai e ka bërë të qartë se unioni do duhet t’i pranojë pasojat nëse vendos t’i ndërpresë negociatat.
“BE-ja gabon nëse mendon se mund ta nënshtrojë Turqinë me një vendim të tillë; ajo nuk e kupton dinamikën shoqërore të Turqisë apo të rajonit,” është shprehur Kallën në një intervistë për televizionin turk A Haber.
Standardet e dyfishta të BE-së nuk janë harruar të vihen në dukje dhe nga ai, që ka kujtuar se ndërsa zyrtarët europianë u kujtuan ta vizitojnë Turqinë vetëm një muaj pas përpjekjes së dështuar për grusht shteti, ata reaguan menjëherë kur deputetët e një partie pro terroristëve të PKK-së u ndaluan në kuadër të një hetimi për terrorizëm.
“Nëse ata përpiqen ta kërcënojnë Turqinë me vendime të tilla, duhet ta dinë se do të ketë pasoja,” ka theksuar Ibrahim Kallën.
Turqia po përballet me një valë të re kritikash të shpërpjestuara pas ndalimit të një numri punonjësish të një gazete, e të arrestimit të disa deputetëve të HDP-së, partisë prokurde, ndërsa nuk pati thuajse asnjë mbështetje nga të njëjtët zyrtarë të BE-së pas puçit ushtarak të 15 korrikut. /tesheshi.com/
