Presidenti turk e ka kritikuar ashpër sot raportin e progresit për vendin e tij, të përgatitur nga Parlamenti Europian.
Duke folur para administratorëve lokalë, Erdogani e ka quajtur këtë raport provokues.
“Raporti i Parlamentit Europian është provokues,” ka thënë ai me zë të ashpër.
Ai ka folur për mendësi desktruktive, e jo konstruktive, në hartimin e këtij raporti, për njëanshmëri e provokim.
“Paraqitja e një raporti të tillë në një periudhë kohore kur shumë nga marrëdhëniet tona me BE-në janë pozitive, duke përfshirë emigrantët, hapjen e disa kapitujve dhe liberalizimin e vizave, është thjesht një akt provokues.”
Kritika të forta ka artikuluar Erdogani për qasjet e raportit mbi çështjen qipriote, mbi ngjarjet e 1915-ës, e mbi luftën kundër PKK-së në juglindje të vendit. Faktet janë shtrembëruar në raport, ka thënë shtetari më i lartë turk.
Krejt i natyrshëm nervoziteti i Erdoganit kur vjen puna te refugjatët. Ndërsa Turqia ka strehuar gjer tani afër tre milionë refugjatë, si asnjë vend tjetër, e pasi një numër udhëheqësish të BE-së do t’i vizitojnë kampet e refugjatëve të Gaziantepit më 23 mars, në raport, sipas presidentit turk, nuk ka asnjë fjalë për këtë fakt.
Erdogan ka kujtuar se mesazhet për solidaritet në luftën kundër terrorizmit nuk kanë kuptim kur fushatat për mbledhje parash dhe takimet e propagandës organizohen nga PKK-ja, PYD-ja dhe YPG-ja në mes të Europës.
Raporti i është kthyer tashmë Parlamentit Europian, i ka sqaruar presidenti administratorët lokalë, duke theksuar se ai nuk është detyrues për Turqinë.
“Duhet ta dini se Bashkimi Europian ka nevojë më shumë për Turqinë nga ç’ka nevojë Turqia për Bashkimin Europian,” ka thënë në përfundim të fjalës Rexhep Tajjip Erdogan. /tesheshi.com/
