Presidenti turk, Recep Tayyip Erdogan reagoi ndaj situatës së tensionuar mes Turqisë dhe disa shteteve europiane, të cilat ndaluan tubimet e zyrtarëve të Ankarasë me komunitetin turk në mbështetje të referendumit të 16 prillit. Erdogan theksoi se vota “Po” në referendumin e 16 prillit, është përgjigja më e mirë, në atë që ai e quajti Evropë “fashiste dhe mizore”.
“Kjo Evropë, si e para Luftës së Dytë Botërore, është raciste, fashiste dhe mizore.. një Evropë anti-islam dhe anti-Turqi”, tha Erdogan në një tubim në Ankara, cituar nga AFP.
Marrëdhëniet në mes të Turqisë dhe Evropës janë tensionuar, pasi Holanda dhe Gjermania anuluan disa tubime të ministrave turq, të cilët dëshironin të merrnin mbështetjen e diasporës turke për referendumin.
Erdogan në vazhdimësi e ka akuzuar Berlinin për “praktika naziste”, ndërkaq Holandën për “fashizëm”.
Zëvendëskryeministri turk, Numan Kurtulmus duke komentuar këto akuza tha se komentet e Turqisë për “nazizëm dhe fashizëm”, po bëhen me qëllim që Evropa “të mos bjerë në kurthin e fashizmit”.
Kjo krizë diplomatike duket se mund të ngadalësojë akoma edhe më shumë përpjekjet e Ankarasë për t’u pranuar në Bashkimin Europian.
Por Erdogan ka thënë se nuk tensionimi i raporteve nuk do të përdoret kundër procesit të anëtarësimit të Turqisë në BE. /tesheshi.com/
