Presidenti turk, Rexhep Tajip Erdogan tha se Turqia së shpejti do të mbyllë kufirin dhe hapësirën ajrore me Irakun e veriut, në përgjigje të një referendumi të pavarësisë së Kurdistanit të mbajtur javën e kaluar.
Erdogan, i cili më herët takoi në Teheran liderët e Iranit, gjithashtu tha se Turqia do të vendosë së bashku me Iranin dhe qeverinë qendrore të Irakut në Bagdad në lidhje me atë se ku do të ndërpresin eksportet e naftës nga Iraku i veriut.
Kurdët në Irakun e veriut dhjetë ditë më parë u deklaruan për pavarësi, duke alarmuan kështu Bagdatin, fqinjët e Irakut dhe fuqitë perëndimore, për shkak të drosë se rezultati i votimit mund të shkaktojë konflikte të reja në Lindjen e Mesme.
Turqia ka shtrënguar mbikqyrjen në kalimin e saj kryesor të kufirit me Irakun menjëherë pas votimit dhe ka ndalur fluturimet në Irakun e veriut. Ajo gjithashtu mbajti ushtrime të përbashkëta ushtarake me ushtarët irakianë në kufi.
Bllokada e tubacionit kurd
Ankaraja megjithatë, ende nuk ka kërcënuar se do të vendosë më shumë sanksione ndaj rajonit kurd ose të ndërpresë eksportet kurde të qindra mijëra fuçive të naftës në ditë përmes territorit të saj për në tregjet botërore.
“Fluturimet në Irakun e veriut tashmë janë pezulluar, dhe hapësira ajrore dhe kufijtë do të mbyllen së shpejti,” tha Erdogan në Ankara.
Ai tha gjithashtu se vendimi për të mbajtur një referendum tregoi “mungesë totale të falendërimit” të autoriteteve rajonale kurde në Irakun e veriut, pas viteve të tregtisë së ngushtë dhe lidhjeve politike me Turqinë.
Më herët, Erdogan i tha mediave turke gjatë kthimit të tij nga Irani, se Ankaraja, Teherani dhe Bagdadi do të vendosin së bashku në lidhje me bllokimin e tubacionit kurd i cili shërben për eksport, dhe shtoi se është koha që autoritetet kurde të largohen.
“Udhëheqja veriore e Irakut është e dehur me rezultatet e referendumit dhe nuk është në dijeni të asaj se çfarë hapa po bën”, tha ai.
Rusët po ndërtojnë tubacionin
Erdogan kritikoi gjithashtu përfshirjen e qytetit të pasur me naftë të Kirkukut në referendum, duke thënë se kurdët nuk kanë kurrëfarë legjitimeti atje dhe janë “pushtues” në atë rajon.
Muajin e kaluar, kompania ruse Rosnjeft përfundoi një marrëveshje të tubacionit të naftës në Rajonin Autonom të Irakut të Kurdistanit, i cili duhet të jetë eksportuesi kryesor i naftës dhe gazit në Turqi dhe Evropë. Tubacioni duhet të ndërtohet në vitin 2019 dhe eksportet duhet të fillojnë në vitin 2020.
Të mërkurën, Presidenti rus Vladimir Putin tha se nuk ishte në interes të askujt ndërprerja e furnizimeve të naftës nga Kurdistani irakian.
Erdogan, megjithatë, i hodhi poshtë këto shqetësime duke thënë se Turqia, Irani dhe Iraku do të marrin një vendim përfundimtar.
Kurdët janë grupi i katërt më i madh etnik në rajon, të shpërndarë nëpër Iran, Turqi, Siri dhe Irak. Të gjitha këto vende janë kundër çdo lëvizjeje që çon drejt krijimit të shtetit kurd, megjithëse kurdët kanë ndërtuar lidhje të forta ndërkombëtare. /tesheshi.com/
