Turqia nuk do të ketë probleme me importin e gazit nga Rusia këtë dimër dhe kjo është pasojë e politikës së jashtme të balancuar të Ankarasë, tha sot presidenti turk Rexhep Tajip Erdogan.
“Politika e balancuar e Turqisë në lidhje me krizën e Ukrainës ka marrë miratimin në mbarë botën. Nëse do të vepronim ndryshe, tani do të na duhej të shqetësoheshim si evropianë se si t’i mbijetojmë dimrit që po vjen. Megjithatë, Ankaraja ka marrë një rrugë tjetër, kështu që ne nuk kemi probleme me gazin”, tha Erdogan, raportoi televizioni shtetëror turk TRT.
Erdogan shtoi se Turqia po kthehet në një qendër të madhe gazi, që është shpresa e botës.
Presidenti rus Vladimir Putin, duke folur në forumin e Javës Ruse të Energjisë, propozoi krijimin e qendrës më të madhe të gazit në Evropë në Turqi dhe devijimin e vëllimit të gazit, tranziti i të cilit përmes Rrjedhës Veriore nuk është më i mundur, në këtë qendër.
Ai tha se kjo mund të nënkuptojë ndërtimin e një sistemi tjetër gazsjellës dhe krijimin e një qendre në Turqi, përmes së cilës do të furnizohej me gaz vendet e treta, në radhë të parë evropiane, nëse janë të interesuar. /tesheshi.com/
