Presidenti turk, Rexhep Tajjip Erdogan, ka qenë i ftuar mbrëmë në një studio televizive, ku ka shfrytëzuar rastin të theksojë mes të tjerash luftën e pakompromis të Turqisë kundër terrorit, ndaj çdo organizate të tillë, qoftë PKK-ja, PYD-ja apo ISIS-i.
Ai ka deklaruar se kjo luftë do të vazhdojë, e pandikuar nga rezultati i zgjedhjeve të tre ditëve më pas. “Lufta jonë kundër terrorit nuk është e kufizuar me një periudhë të shkurtër kohe. Ne do të qëndrojmë fort kundër organizatave terroriste që bashkëpunojnë kundër vendit tonë, pavarësisht zgjedhjeve.”
Një vëmendje e veçantë i është kushtuar aktivitetit të PYD-së, krahut sirian të PKK-së. Erdogan tha se luftëtarët e PYD-së po kryejnë spastrim etnik në rajon kundër jokurdëve. Turqia, u shpreh presidenti, do të ndërmarrë çdo hap për ta ndaluar terrorin e PYD-së në veri të Sirisë. “Turqia nuk ka nevojë të marrë leje nga askush për të ndërhyrë në rajon për të mbrojtur kufijtë e saj,” qenë fjalët e Erdoganit.
“Nëse kurdët tërhiqen dhe nuk formojnë një kanton, atëherë nuk ka problem. Por nëse prirja vazhdon, atëherë do të bëhet çfarë është e nevojshme, përndryshe do të përballemi me probleme. Jemi të vendosur të luftojmë gjithçka që na kërcënon përgjatë kufirit sirian, brenda apo jashtë.”
Ai do ta kritikonte hapur Perëndimin për standarde të dyfishta karshi ISIS-it dhe PKK-së, e tha se mbështetja perëndimore për rebelët kurdë sirianë nënkupton veç ndihmë për terrorizmin.
Aleatët perëndimorë po armatosin kurdët, vijoi Erdogani, duke nënvizuar se ato nuk e pranojnë PYD-në si organizatë terroriste. “Perëndimi ende ka mendësinë, ‘terroristi im është i mirë, i juaji është i keq’.”
Turqia do të jetë të dielën në zgjedhje, dhe rezultati i tyre ka një rëndësi të jashtëzakonshme për stabilitetin e vendit. /tesheshi.com/
