Presidenti turk Erdogan tha se AKP-ja (partia në pushtet e drejtuar prej tij) ka arritur suksese të shumta gjatë qeverisjes së saj, ndër të tjera duke ndërtuar autostrada dhe aeroporte në të gjithë vendin.
“Përveç kësaj, gjatë këtyre 18 viteve të ekzistencës së partisë sonë dhe gjatë 17 viteve në pushtet, çdo herë që ne bënim punët tona të mëdha dhe ndërtonim, në të njëjtën kohë duhet të luftonim kundër forcave të ndryshme”, tha Erdogan në fjalimin e tij në ceremoninë e mbajtur me rastin e 18-vjetorit të themelimit të AKP-së.
Ai theksoi se Turqia është sot një vend shumë më i fuqishëm me të cilin nuk mund të luhet lehtë.
“Pasi Turqia ka arritur këtë nivel në fushat e demokracisë, ekonomisë, diplomacisë, sigurisë dhe besimit, është shumë më e vështirë dhe e shtrenjtë të luash me të dhe ta bllokosh. Ata dikur ishin në gjendje të tronditnin Turqinë duke manipuluar 5 miliardë dollarë. Ndërsa sot nuk mund të kenë sukses edhe nëse bëjnë 10-20 herë përpjekje më të mëdha”, tha Erdogan.
Ai theksoi se vendi i tij kishte rritur ndjeshëm fuqinë politike dhe ekonomike në botë, duke përmendur se ishte e rëndësishme të ruhej pozita globale. /tesheshi.com/
