Mesazhit për Fiter Bajram, Presidenti turk Rexhep Tajjip Erdogan i ka shtuar dhe pak politikë. Pasi ka uruar besimtarët muslimanë për festën e së dielës në përfundim të një muaji agjërimi, siç ishte Ramazani, Erdogan ka folur për rengjet që sipas tij vazhdojnë t’i bëhen Turqisë, për ta goditur atë, dobësuar. Dhe Erdogan tha se ishte i ndërgjegjshëm për ato që ai i quajti skenare në dëm të Turqisë.
“Jemi të vetëdijshëm për lojërat në Irak dhe Siri, ashtu siç vërejmë tendencat për skenarë të mundshëm të krizës në rajon. Megjithatë, ne shpresojmë se që të gjithë janë të vetëdijshëm për këtë realitet. Turqia është një kafshatë mjaft e madhe e cila si e tillë nuk mund të gëlltitet përmes këtyre lojërave. Jemi të vendosur t’u përgjigjemi atyre që mendojnë se me anë të këtyre lojërave mund të marrin vendin tonë”, tha Erdogan.
Reagimi i tij vjen dhe pas shpërthimit të krizës së Gjirit, ku disa vende me në krye Arabinë Saudite, i janë kundërvënë Katarit, një aleat i ngushtë i Turqisë, që sipas të gjitha gjasave ka në shënjestër këtë të fundit
“Territori në të cilën jetojmë na është dhënë si atdhe dhe është lagur me gjakun e paraardhësve tanë. Detyra jonë është ta lëmë për gjeneratat e ardhshme si një vend i fortë, i begatë, i qëndrueshëm dhe i sigurt. Për këtë ne do të vazhdojmë të punojmë ditë e natë”, tha Erdogan në mesazhin e tij në prag të Fiter Bajramit. /tesheshi.com/
