Turqia është e gatshme të marrë sistemin e mbrojtjes ajrore të Patriotëve të SHBA-së, por nuk do të pranojë të privojë veten nga sistemi i blerë tashmë S-400, tha Presidenti turk Rexhep Tajip Erdogan të enjten.
Duke folur para gazetarëve gjatë fluturimit me aeroplan nga Uashingtoni drejt Ankarasë pas takimit me Donald Trump, Erdogan tha se presidenti amerikan ishte i angazhuar në një “përpjekje të sinqertë” për të zgjidhur një mosmarrëveshje midis dy aleatëve të NATO-s.
Turqia mori dorëzimin e sistemit S-400 të Rusisë këtë vit, duke hedhur poshtë paralajmërimet nga Shtetet e Bashkuara se ai mund të përbënte një kërcënim për sigurinë e NATO-s.
Si rezultat i kësah mosmarrëveshjeje, Uashingtoni pezulloi pjesëmarrjen e Turqisë në programin shumëkombësh luftarak F-35.
“Ne u kemi thënë atyre se mund të marrim edhe Patriotët. Ne e konsiderojmë propozimin për heqjen plotësisht të S-400 (nga Turqia) si ndërhyrje në të drejtat tona sovrane. Eshtë jashtë diskutimit që të mos kemi S-400 dhe të drejtohemi vetëm te Patriotët”, tha Erdogan.
“Unë gjithashtu dua që Amerika dhe Rusia të jenë miqtë e mi. Të gjitha përpjekjet tona janë të fokusuara në këtë drejtim”, tha Erdogan.
Mosmarrëveshja për sistemet konkurruese të mbrojtjes ajrore është një aspekt i tensionit midis dy vendeve. Turqia gjithashtu është kritikuar në Uashington për ofensivën e Sirisë muajin e kaluar.
Turqia, ndërkohë, është e zemëruar nga mbështetja e SHBA për forcat kurde që ajo i konsideron një kërcënim për sigurinë, si dhe për refuzimin e Uashingtonit për të ekstraduar imamin Fetullah Gulen, të cilin Ankaraja akuzon për grusht-shtetin e dështuar në vitin 2016. /tesheshi.com/
