Presidenti turk ka shfrytëzuar dje një asamble të HAK-İŞ-it, një konferederate sindikatash, për të deklaruar në fjalën e tij se sulmi vetëvrasës me bomba në prag të një tubimi në Ankara ishte një akt terrorist kolektiv, i planifikuar dhe i kryer nga një numër aktorësh terroristë.
Erdogani tha se pas sulmit në Ankara qëndronin ISIS-i, PKK-ja, dega e saj siriane, PYD-ja, dhe shërbimi i fshehtë sirian, el-Muhaberat.
“Janë përfshirë të tëra, PKK-ja, ISIS-i, el-Muhaberat-i dhe PYD-ja. Ato e planifikuan së bashku këtë operacion,” ka thënë presidenti turk.
Ai u bëri thirrje qytetarëve kurdë të jenë syhapët ndaj provokimeve e të qëndrojnë larg përpjekjeve për ta përçarë shoqërinë.
Sulmet vetëvrasëse me bomba në fillim të këtij muaji në Ankara lanë mbi 100 të vdekur dhe qindra të tjerë të plagosur. Ato janë cilësuar si sulmet më vdekjeprurës në historinë moderne të Turqisë, dhe deri tani është mësuar vetëm emri i njërit prej kryerësve të tyre, i quajtur Junus Emre Alagëz. Dhjetëra persona janë të ndaluar, ndërsa hetimet vazhdojnë ende. /tesheshi.com/
