Presidenti turk ka reaguar përmes një deklarate të shkruar për aktin terrorist në klubin e natës në Stamboll.
Pasi shpreh ngushëllimet e tij për ata të cilët humbën jetën në këtë masakër, Erdogani shpreh bindjen se sulmet terroriste në Turqi gjatë javëve të fundit nuk janë të pavarura nga zhvillimet në rajon.
“Ne jemi të vetëdijshëm se këto sulme, të kryera nga organizata të ndryshme terroriste, e që vënë në shenjë qytetarët tanë, nuk janë të pavarura nga ngjarjet e ndodhura në rajonin tonë.”
“Ata të cilët vënë në shenjë paqen e Turqisë, dhe nënkontraktuesit e tyre, synojnë të destabilizojnë vendin tonë, të demoralizojnë popullin tonë dhe të krijojnë kaos,” thuhet në deklaratën jo shumë të gjatë të presidentit Erdogan.
Ai i ka kërkuar popullit turk të ruajë qetësinë dhe të qëndrojë i bashkuar, duke u zotuar se Turqia është e vendosur të bëjë ç’është e nevojshme në rajon për të ruajtur sigurinë dhe paqen e qytetarëve të saj.
“Nuk kemi për t’i lejuar këto lojëra të pista,” ka nënvizuar kreu i shtetit turk. “Si vend dhe si popull, do të luftojmë gjer në fund jo vetëm kundër sulmeve me armë të organizatave terroriste dhe forcave pas tyre, por edhe ndaj sulmeve të tyre ekonomike, politike dhe sociale.”
“Jemi të vendosur t’i shkatërrojmë nga themelet kërcënimet ndaj vendit tonë!” /tesheshi.com/
