Bashkimi Evropian po përpiqet të distancohet nga Turqia, tha presidenti turk Rexhep Tajip Erdogan, duke komentuar raportin e Parlamentit Evropian për Turqinë për vitin 2022 dhe tha se Ankaraja do të bëjë vlerësimet e nevojshme dhe se mund të shkëputet nga BE-ja nëse është e nevojshme.
Erdogan po fliste në një konferencë shtypi në Stamboll përpara nisjes së tij për takimin e Asamblesë së Përgjithshme të OKB-së në New York javën e ardhshme.
Duke folur për procesin e anëtarësimit të vendit të tij në Bashkimin Evropian, Erdogan tha se Ankaraja do të bëjë vlerësimet e nevojshme në lidhje me zhvillimet e fundit: “Pas këtyre vlerësimeve, ne mund të ndajmë rrugët me BE-në nëse është e nevojshme”.
Erdogan iu referua edhe procesit të anëtarësimit të Suedisë në NATO, duke thënë edhe një herë se vendi duhet të përmbushë detyrimet e veta: “Para së gjithash, Suedia duhet të përmbushë detyrën e saj, nuk mjafton përgatitja e një ligji, është e nevojshme zbatimi i tij. Nëse i lejojnë terroristët të demonstrojnë nën mbrojtjen e policisë së Suedisë, kjo do të thotë se ata nuk po përmbushin detyrimet e tyre,” tha Erdogan, duke shtuar: “Perëndimi vazhdon të thotë ‘Suedi, Suedi’. Ne themi se nuk mund të themi po ose jo derisa vendos parlamenti ynë”.
Turqia ka zgjeruar propozimin e saj për të zhvilluar bisedime trepalëshe për rajonin e Karabakut të Azerbajxhanit, duke përfshirë këto dy vende dhe Armeninë fqinje, ndërsa shpreh gatishmërinë për bisedime katërpalëshe që do të përfshijnë Rusinë, tha Erdogan.
“Ne u përcollëm atyre (Azerbajxhanit dhe Armenisë) propozimin tonë për një takim trepalësh nën udhëheqjen tonë. Përveç qasjes trepalëshe, ne dhamë edhe një propozim katërpalësh,” tha Erdogan, duke theksuar se ende nuk ka pasur përgjigje për këtë dhe se do ta diskutonte me kolegun azerbajxhanas Ilham Alijev. /tesheshi.com/
