Presidenti turk, Rexhep Tajip Erdoan tha se ai beson që dialogu me SHBA-në do të rinisë në momentin kur Donald Trump të marrë detyrën më 20 janar.
Duke folur në konferencën e 9-të vjetore të ambasadorëve në Ankara, Erdogan theksoi se Turqia dëshiron që të shohë se SHBA-në të mbështesë aleatin e saj Turqinë kundër të gjitha kërcënimeve terroriste, përfshirë grupin Daesh dhe atë gulenist të FETO-s, pa asnjë hezitim.
Marrëdhëniet në mes të Turqisë dhe SHBA-ve janë përkeqësuar pas dështimit të administratës së Obama-s për të bashkëpunuar me Turqinë kundër organizatave YPG dhe FETO, vë në dukje media vendase.
Ankaraja tani pret që administrata e Trump-it të punojë ngushtë me Turqinë, ku si pikë synim kryesor është arrestimi i udhëheqësit të FETO-s, Fethullah Gylen dhe ekstradimin e tij përfundimtar.
Më tej, Erdogan vuri në dukje edhe një herë se Turqia nuk ka ndryshuar prioritetet e saj sa i përket anëtarësimit në Bashkimin Evropian.
“BE-ja mbetet ende si një zgjedhje strategjike për Turqinë”, tha ai, duke shtuar më pas se vendi i tij do të vazhdojë të ndërmarrë hapa drejt anëtarësimit në BE, porse nuk nuk do të ketë heshtje karshi politikave hipokrite të bllokut.
Erdogan i kërkoi bllokut europian që të përmbushë zotimin e saj në kuadër të fushëveprimit të marrëveshjes së ripranimit të nënshkruar në mars të vitit të kaluar, dhe të sigurojë udhëtimin pa viza për qytetarët turq siç kishte premtuar, e më pas përshëndeti sugjerimet për mbajtjen e një samiti për të diskutuar një numër çështjesh, përfshirë anëtarësimin e Turqisë në BE.
Erdogan tha gjithashtu se Turqia nuk është i vetme në luftën e saj kundër islamofobisë dhe racizmit, dhe se ajo duhet të bashkojë duart me komunitetet e tjera muslimane dhe grupet e emigrantëve për të luftuar atë. /tesheshi.com/
