Duke folur në Paris, ditën e parë të Samitit të OKB-së për ndryshime klimatike; përpara 140 liderëve botërore, Presidenti i Turqisë, Rexhep Tajjip Erdogan, i është përgjigjur direkt Presidentit rus, Vladimir Putin, i cili akuzoi Turqinë se ka blerë naftë nga ISIS.
Në qëndrimin e tij, Presidenti turk theksoi angazhimin e Turqisë për të luftuar terrorin e ISIS-it në rrugën më të shkurtër, duke shtuar se ai do të jepte dorëheqjen menjëherë, nëse provohet se është blerë naftë nga ISIS-i.
“Nëse do të sillni qoftë edhe një provë, unë largohem menjëherë nga posti që mbaj dhe i them Putinit: po ti do ta bësh të njëjtën gjë?!
Erdogan i bëri thirrje homologut të tij rus të shpjegojë se ku e shet naftën ISIS-i. Ai tha se qytetarët siriano-rusë e kanë blerë naftën nga ISIS-i dhe kjo është vërtetuar nga burime zyrtare Amerikane.
“Ndaj së pari ata (Rusia) duhet të përgjigjen për këtë akuzë”, theksoi Erdogan para të gjithë liderëve botërorë, por edhe mediave të të gjithë planetit që ndjekin eventin e Parisit.
Presidenti i Turqisë, shtoi më tej se akuza e Moskës ndaj Ankarasë nuk është morale, pasi “çdo gjë që pretendon duhet të provohet”.
Duke ironizuar me frazën e rusëve, Erdogan theksoi se dihen burimet nga ku turqit e marrin naftën: “Ne e blejmë atë nga Rusia, Irani, Aserbaxhani, Katari dhe Nigeria. Ne nuk mund dhe do të pranojmë shpifje të tilla”, tha kreu i shtetit turk në fjalimin e tij.
Ndërkaq, në lidhje me vendimin e Moskës për t’i vënë sanksione Ankarasë, Erdogan tha se “ vendimi duhet marrë me durim dhe jo emocionalisht”.
Putin deklaroi në fjalimin e tij se arsyeja e rrëzimit të avionit rus nga turqit, ishte që të mos goditen rezervat e naftës së ISIS-it.
Pas rrëzimit të avionit rus, Putin firmosi një dekret për t’i vënë sanksione Ankarasë, kur Erdogan tha se Turqia nuk ka pse dhe nuk do t’i kërkojë falje Moskës. Zyrtarët rusë thanë se mund të ndalohen (nëse duhet), edhe importet e prodhimeve bujqësore nga Turqia. Në fakt Rusia importon një sasi të madhe prodhimesh, kryesisht drithëra, perime, fruta të freskëta dhe të thata, si dhe erëza të ndryshme nga Turqia.
Marrë nga dailysabah.com –tesheshi.com
