Presidenti turk Rexhep Tajip Erdogan tha të premten se Aleanca e Atlantikut të Veriut (NATO) nuk mund të vazhdojë partneritetin e saj me administratën izraelite, raporton Reuters.
“Derisa të vendoset një paqe gjithëpërfshirëse dhe e qëndrueshme në Palestinë, Turqia nuk do të miratojë përpjekjet për të bashkëpunuar me Izraelin brenda NATO-s,” tha Erdogan në një konferencë shtypi në samitin e NATO-s në Uashington, duke shtuar se Turqia po vazhdon përpjekjet e saj diplomatike për t’i dhënë fund konfliktit mes Rusisë e Ukrainës.
Ai vuri në dukje se kishte urdhëruar ministrin e Jashtëm turk Hakan Fidan të takohej me presidentin sirian Bashar al-Assad për të filluar rivendosjen e marrëdhënieve me Sirinë. Ankaraja “në një moment” do t’i bëjë një ftesë Asadit për bisedime të mundshme mbi rivendosjen e marrëdhënieve midis dy fqinjëve, tha Erdogan.
Shitja e avionëve F-16
Lidhur me shitjen e avionëve F-16 në Turqi, Erdogan tha: “Kam folur me zotin (Presidentin e SHBA-së Joe) Biden. Më tha: Do ta zgjidh këtë problem për tre deri në katër javë”.
Në mars, Senati i SHBA hodhi poshtë një përpjekje për të ndaluar shitjen prej 23 miliardë dollarësh të avionëve F-16 dhe pajisjeve të modernizimit në Turqi, që u lejua nga administrata Biden pasi Turqia miratoi anëtarësimin e Suedisë në NATO.
Erdogan tha se Turqia pret solidaritetin e aleatëve të NATO-s në luftën e saj kundër terrorizmit. Ankaraja përsërit se milicia YPG është një organizatë terroriste, e lidhur ngushtë me grupin e armatosur të Partisë së Punëtorëve të Kurdistanit (PKK). Aleatët perëndimorë të Turqisë e konsiderojnë PKK-në një grup terrorist, por jo YPG-në.
Qëllimi i Turqisë është të bëhet anëtare e përhershme dhe jo vetëm vëzhguese e Organizatës së Bashkëpunimit të Shangait (SCO), shtoi presidenti turk. Agjencitë deklarojnë se SCO është një klub sigurie, politik dhe ekonomik që u krijua në 2001 nga Rusia, Kina dhe vendet e Azisë Qendrore si një kundërpeshë ndaj aleancave perëndimore.
Diplomacia mes Kievit dhe Moskës
Në të njëjtën konferencë, Erdogan paralajmëroi një “konflikt të drejtpërdrejtë” midis NATO-s dhe Rusisë dhe deklaroi se diplomacia duhet të jetë një opsion në tryezë kur bëhet fjalë për luftën në Ukrainë, raporton AFP.
“Unë sinqerisht thashë se Aleanca nuk duhet të lejohet kurrë të marrë pjesë në luftën në Ukrainë”, tha lideri turk në kryeqytetin e Shteteve të Bashkuara të Amerikës.
Ai tha se Turqia, anëtari i rrallë i NATO-s që nuk i është bashkuar sanksioneve kundër Rusisë, mbështet “integritetin territorial dhe sovranitetin e Ukrainës”.
Por, “ai theksoi gjithashtu se diplomacia nuk duhet të përjashtohet dhe se negociatat nuk duhet të nënkuptojnë kapitullim”, transmetojnë agjencitë. /tesheshi.com/
