Presidenti turk Rexhep Tajip Erdogan pati një bisedë telefonike me presidentin rus Vladimir Putin të hënën. Gjatë këtij komunikimi, presidenti turk deklaroi se është koha që OKB-ja të veprojë për planin për hapjen e një korridori të sigurt për eksportin e drithit në Detin e Zi.
Sipas deklaratës së Drejtorisë së Komunikimit të Presidencës turke, gjatë bisedës Putin-Erdogan, përveç situatës në Siri, është diskutuar edhe për luftën në Ukrainë dhe për krijimin e korridoreve të sigurta për eksportin e grurit në Detin e Zi.
Duke theksuar se i kushton rëndësi zgjerimit të mekanizmit ndërkufitar në Siri, Erdogan tha se “është koha për të ndërmarrë veprime për planin e Kombeve të Bashkuara për të krijuar korridore të sigurta për eksportin e drithit në Detin e Zi”.
Duke përsëritur se lufta midis Ukrainës dhe Rusisë duhet të përfundojë me një marrëveshje paqeje të qëndrueshme dhe të drejtë përmes negociatave, Erdogan tha se Turqia është e gatshme të kontribuojë në çdo mënyrë të mundshme për ringjalljen e procesit të negociatave.
Ministri turk i Mbrojtjes Hulusi Akar ka thënë se “ka njëfarë progresi në çështjen e eksportit të grurit nga portet e Detit të Zi”, por çështjet teknike janë në pritje që kërkojnë diskutime me Rusinë, Ukrainën dhe OKB-në. Nga ana e tij, ministri i Jashtëm turk Mevlut Çavusoglu tha se nëse Moska dhe Kievi bien dakord për “çështjen e grurit”, do të krijohet një “zonë e sigurt” jashtë ujërave të Ukrainës. /tesheshi.com/
