Presidenti turk Rexhep Tajip Erdogan tha të enjten se lidhjet e Turqisë me Shtetet e Bashkuara nuk janë të mira dhe se Uashingtoni duhet të “rregullojë” gjërat për sa i përket Ankarasë në çështjen e blerjes së sistemeve mbrojtëse ruse S-400.
Lidhjet midis aleatëve të NATO-s ranë në pikën e tyre më të ulët në fillim të këtij viti, kur Shtetet e Bashkuara vendosën sanksione ndaj industrisë ushtarake turke për shkak të blerjes së sistemeve ruse të mbrojtjes S-400, raporton Reuters.
Uashingtoni e përjashtoi Ankaranë nga programi i saj luftarak F-35, ku ishte blerësi dhe prodhuesi.
“Nuk mund të them që po zhvillohet një proces i shëndetshëm në marrëdhëniet turko-amerikane. Kemi blerë F-35, kemi paguar 1.4 miliardë dollarë dhe ata aeroplanë nuk na janë dorëzuar. Shtetet e Bashkuara duhet ta zgjidhin këtë së pari”, u tha Erdogan gazetarëve pas pjesëmarrjes në Asamblenë e Përgjithshme të Kombeve të Bashkuara në Nju Jork.
Presidenti turk ka thënë se Ankaraja do t’i plotësojë nevojat e saj të mbrojtjes diku tjetër nëse Uashingtoni nuk ndihmon.
Të dy vendet duhet të bashkëpunojnë si miq, por “drejtimi aktual nuk premton”, tha Erdogan, duke shtuar se Presidenti amerikan Joe Biden nuk kishte “filluar mirë”. /tesheshi.com/
