Presidenti turk Rexhep Tajip Erdogan ka thënë se autoritetet turke do të ofrojnë mbështetje për kompanitë që japin një kontribut të fuqishëm në mbajtjen e stafit në punë.
“Ne po mbështesim kompanitë që janë zotuar të punësojnë të rinjtë tanë me një shkollë të mesme ose fakultet për të paktën 12 muaj,” tha Erdogan në një konferencë shtypi në Ankara pas mbledhjes së kabinetit.
Duke theksuar se qytetarët i kanë dhënë lamtumirën 2021-shit, i cili ishte i vështirë për botën dhe Turqinë, ai tha se në vitin 2022 kanë hyrë me shpresa dhe optimizëm të reja.
Ai tha se qytetarët e Turqisë ende kanë besim në programin ekonomik të autoriteteve turke.
“Fakti që 78 miliardë lira janë transferuar në depozitat e mbrojtura me valutë të lirës turke në një periudhë të shkurtër kohore, është një shenjë e besimit të qytetarëve tanë në programin tonë ekonomik”, tha Erdogan.
Ai theksoi se do të bëjë gjithçka që është e nevojshme në periudhën e ardhshme për të kundërshtuar fuqishëm rritjen e inflacionit në Turqi.
“Ne jemi të vendosur t’i rezistojmë inflacionit, të cilin dikur e ulëm në 6 për qind në Turqi, dhe ta reduktojmë përsëri në shifra njëshifrore sa më shpejt të jetë e mundur,” tha Erdogan, duke shtuar se autoritetet kanë qenë gjithmonë me qytetarët turq dhe në të kaluarën.
“Nuk kemi lënë asnjë nga qytetarët tanë nën presionin e rritjes së çmimeve. Kemi marrë masa të veçanta që të ardhurat e qytetarëve tanë të mos bien nën presionin e inflacionit”.
Ai iu referua dhe treguesve të sapopublikuar zyrtarë për eksportet e Turqisë për vitin 2021, duke thënë se “me eksportet prej 225 miliardë e 368 milionë dollarësh, që arritëm vitin e kaluar, Turqia e rriti pjesën e saj në eksportet globale në më shumë se një për qind për herë të parë në historinë e Republikës”.
Erdogan theksoi se kanë një sërë projektesh të planifikuara për ngritjen e eksporteve të Turqisë në një nivel edhe më të lartë këtë vit, duke shtuar se po i afrohen synimit të suficitit të tregtisë së jashtme të Turqisë, pra kur vlera e eksporteve tejkalon vlerën e mallrave të importuara dhe shërbimet.
Deficiti i tregtisë së jashtme të Turqisë në vitin 2021 u ul me 7,8 për qind krahasuar me një vit më parë dhe arriti në 45,9 miliardë dollarë, ndërsa mbulimi i importeve me eksporte u rrit në 83,1 për qind. /tesheshi.com/
