Rusia ka kërkuar një shpjegim nga Rexhep Tajip Erdogan pasi presidenti turk tha se kishte dërguar trupa në Siri për të rrëzuar regjimin e Bashar al-Asad.
Ky është fërkimi i parë midis Ankarasë dhe Moskës pas rehabilitimit të lidhjeve në mes të dy vendeve këtë verë dhe vjen në një kohë kur forcat qeveritare siriane të mbështetur nga forcat ruse po bëjnë një përparim në zonat e mbajtura nga kyengritësit e Halepit.
Në një fjalim të martën, Erdogan dënoi mosveprimin e bashkësisë ndërkombëtare pas vdekjes së civilëve në Siri dhe tha se inkursioni i vazhdueshëm ndërkufitar i Turqisë kishte për qëllim të “sjellë drejtësi” kundër “tiranit” Assad. “Ne jemi atje për t’i dhënë fund sundimit të tiranit Assad, i cili është duke përhapur terror shtetëror”, tha ai.
“Kjo është një deklaratë shumë e rëndë, e cila ndryshon nga ato të mëparshmet”, tha të mërkurën Dmitry Peskov, zëdhënësi i Vladimir Putinit. “Ne shpresojmë që partnerët tanë turqë do të na japin shpjegim në lidhje me këtë.” Ministria e jashtme siriane tha se deklarata e Erdoganit “tregon qartë se agresioni flagrant turk kundër territorit sirian është vetëm rezultat i ambicieve dhe iluzione të një despoti ekstremist”.
Turqia thuhet se ka qenë nikoqir i bisedimeve mes të Rusisë dhe kryengritësve anti-Asad për të ndërmjetësuar një armëpushim në Halep, ku forcat e regjimit kohët e fundit kanë korrur fitore të mëdha.
Një burim kryengritës tha për AFP, se njëri prej takimeve të fundit në një seri takimesh midis grupeve ruse dhe tyre u mbajt në Ankara të hënën.
Turqia ka kohë që është një kritike e regjimit sirian dhe ka furnizuar me armë dhe furnizime të tjera grupet e ndryshme kryengritëse që nga fillimi i luftës në vitin 2011. Rusia hyri në luftë në anën e Asadit në vitin 2015. /tesheshi.com/
