Turqia është gati të presë një samit Rusi-Ukrainë, tha presidenti turk Rexhep Tajip Erdogan teksa mirëpriti homologun e tij ukrainas Volodymyr Zelensky në Stamboll. Takimi i tyre zgjati rreth një orë e gjysmë.
“Ne jemi gati të presim një takim paqeje në të cilin do të marrë pjesë Rusia”, tha presidenti turk, duke iu drejtuar gazetarëve me presidentin ukrainas në krah të tij.
Erdogan përsëriti “mbështetjen e tij për sovranitetin dhe integritetin territorial të aleatit (të tij) strategjik, Ukrainës.
“Nuk ka pasur asnjë lëvizje diplomatike për vendosjen e paqes të krahasueshme me tryezën e negociatave që organizuam në Stamboll në mars 2022. Që nga fillimi, ne kemi kontribuuar më së shumti në përfundimin e luftës përmes negociatave,” theksoi Tajip Erdogan.
“Duke vazhduar solidaritetin tonë me Ukrainën, ne do të vazhdojmë të punojmë për përfundimin e luftës dhe për një paqe të drejtë pas negociatave”, shtoi ai.
Lidhur me një mekanizëm të ri për të garantuar sigurinë e transportit tregtar në Detin e Zi, presidenti turk konfirmoi “qëllimin e tij për të arritur një marrëveshje midis palëve” duke deklaruar gatishmërinë e tij për të ofruar ndihmën e tij.
“Ne kemi të njëjtin qëndrim për sigurinë ushqimore, shkëmbimin e të burgosurve dhe garancitë e lundrimit: ne duhet t’i sigurojmë ato,” shtoi ai. “Nuk po e humbim shpresën!”
“Gjatë konsultimeve tona ne shkëmbyem mendime edhe për çështje që kanë të bëjnë me stabilitetin në Detin e Zi, si korridoret e eksportit dhe sigurinë e lundrimit. Iniciativa e Detit të Zi shmangi një krizë globale ushqimore, duke lejuar afro 33 milionë tonë drithë për të arritur tek ata në nevojë. Në këtë sallë është lidhur edhe kjo marrëveshje. Nëse ka një synim për të arritur një marrëveshje të re mes palëve, ne jemi të gatshëm të ofrojmë mbështetjen më të mirë të mundshme si në të kaluarën”, sqaroi presidenti turk.
Erdogan deklaroi gjithashtu se Turqia do të ndihmojë ndjeshëm në rindërtimin e Ukrainës pasi të përfundojë lufta.
Nga ana e tij, Volodymyr Zelensky falënderoi Recep Tayyip Erdogan dhe popullin turk për mbështetjen e tyre për sovranitetin, pavarësinë dhe integritetin territorial të Ukrainës.
Ai bëri thirrje për një paqe të drejtë që është urgjente dhe vuri në dukje se në Turqi u takua me kompani të industrisë së mbrojtjes. Ai tha se Ukraina dhe Turqia nënshkruan një marrëveshje bashkëpunimi ekonomik që do të lehtësojë tregtinë.
“Rajoni i Detit të Zi është gjithashtu shumë i rëndësishëm. Aty kanë kaluar shumë anije. Më shumë se 30 milionë tonë drithë kanë kaluar tashmë në këtë korridor”, tha ndër të tjera presidenti ukrainas. /tesheshi.com/
