Presidenti turk Rexhep Tajip Erdogan, me një gjuhë tepër kritike komentoi fjalimin e kryeministrit izraelit Benjamin Netanyahu në Kongresin Amerikan. Ai e quajti atë “Hitleri i kohës sonë” dhe një “kasap”, si dhe sulmoi senatorët dhe kongresmenët amerikanë që e duartrokitën.
“Që nga 7 tetori njerëzit e kanë parë nga larg vrasjen e foshnjave sikur të shikonin një film. Vrasësi i tyre, Netanyahu, duartrokitet në SHBA. Çfarë lloj projekti është ky? A është e mundur të kuptohet kjo? Po demokracia, po liria, po të drejtat e njeriut”, tha ndër të tjera Erdogan.
Ai më tej argumentoi se “sistemi aktual botëror, i krijuar për të mbrojtur interesat e fituesve të Luftës së Dytë Botërore, ka filluar të skadojë. Mjafton të shikojmë krizat e së shkuarës së afërt për të treguar se sistemi tashmë ka ngritur flamurin e falimentimit”.
Duke vazhduar, ai sulmoi ligjvënësit amerikanë: “Dhoma e Përfaqësuesve duartrokiti ata që ka masakruan afro 40,000 njerëz.”
“Nga njëra anë, ka një valë duartrokitjesh atje. Për të mos ndalur kasaphanën, jemi përballë një fenomeni të humbjes së arsyes dhe ndërgjegjes, nga ata që pritën në Kongresin e tyre dhe ovuan 57 herë fjalimin delirant të një kasapi. Ata që me fjalë japin leksione demokracie për mbarë botën, nuk kanë turp që lartësojnë Hitlerin e kohës sonë. Nuk skuqen, nuk ka drejtësi, nuk ka ligj, nuk ka rregulla, nuk ka dhembshuri. Ata nuk marrin asnjë përgjegjësi për paqen. Nuk ka asnjë përpjekje për të forcuar shpresën e njerëzimit. Jemi dëshmitarë të një gjendjeje çmendurie në të cilën shtypësi nderohet për mizorinë e tij dhe të drejtat e të shtypurve shpërfillen”, tha Erdogan me ton të fortë.
Në përfundim, ai argumentoi se e gjithë kjo tregon se “vendet që mund të qëndrojnë të fortë, kanë mundësinë të dalin me sukses nga kaosi që po trondit sistemin global”. /tesheshi.com/
