Hamasi nuk është një organizatë terroriste, ata janë njerëz që luftojnë për atdheun e tyre, tha presidenti turk në udhëtimin e tij të kthimit nga Riadi.
Presidenti turk ka shpërthyer sërish ashpër ndaj Izraelit, njëherësh duke avokuar rezistencën palestineze, duke i dhënë asaj një tagër moral për luftën që po bën.
“Ata duan që ne të themi se Hamasi është një organizatë terroriste. Jo, nuk është një organizatë terroriste. Ata janë një grup njerëzish që po luftojnë për atdheun e tyre”, tha Erdogan, duke folur para gazetarëve në aeroplanin presidencial, gjatë udhëtimit të tij të kthimit nga Riadi, ku morri pjesë në sesionin e përbashkët të jashtëzakonshëm të Ligës Arabe dhe Organizatës së Bashkëpunimit Islamik.
Erdogan theksoi se komuniteti ndërkombëtar duhet të marrë masa kundër masakrave të kryer në Gaza nga forcat ushtarake izraelite, duke akuzuar Këshillin e Sigurimit të OKB-së për mosveprim.
“Izraeli ka humbur mbështetjen e bashkësisë ndërkombëtare pas sulmeve të fundit në Gaza. Edhe pse qeveritë e vendeve të ndryshme janë në garë për të shprehur mbështetjen për qeverinë izraelite, sipas synimeve të tyre imperialiste, në sytë e komunitetit botëror, Izraeli tani është një vend që vret foshnjat”, tha presidenti turk, duke shpjeguar se vendi i tij është i gatshëm të diskutojë dhe të ndërmarrë veprime me shtete të tjera për të siguruar që masakra dhe vdekjet e civilëve në Gaza të marrin fund.
“Kjo luftë do të bëhet një përballje mes së mirës dhe së keqes, gënjeshtrës dhe së vërtetës, shtypësit dhe të shtypurit”, shtoi Erdogan. /tesheshi.com/
