Presidenti turk Rexhep Tajip Erdogan, tha këtë të premte se natën e 15 korrikut 2016, gjatë tentativës për grushti shteti, nga FETO sipas Ankarasë, u pa se fjala e fundit nuk vendoset me top e pushkë, por me besim dhe zemër.
Erdogan foli në një tubim përkujtimor në sheshin Sarachane të Stambollit, duke shënuar përvjetorin e gjashtë të grushtit të shtetit të 15 korrikut 2016, gjatë të cilit u vranë të paktën 251persona dhe u plagosën 2,734 të tjerë.
“Natën e 15 korrikut, ne pamë se fjala e fundit nuk përcaktohet nga topi dhe pushka, por nga besimi dhe zemra”, tha Erdogan para mijëra qytetarëve të mbledhur në sheshin përballë Bashkisë së Stambollit.
Ai tha se do të vazhdojë me vendosmëri të ndërtojë një Turqi të madhe dhe të fortë, në mënyrë që vendi i tij të mos përballet më kurrë me fatkeqësi si 15 korriku.
“Patjetër që do të përfundojmë ndërtimin e një Turqie të madhe dhe të fuqishme. Vetëm kështu mund t’i shpërblejmë dëshmorët tanë”, tha Erdogan.
Ai theksoi se Aleanca Popullore, e cila përbëhet nga Partia për Drejtësi dhe Zhvillim (AK Parti) në pushtet dhe Partia Lëvizja Kombëtare (MHP), e dëshmoi luftën e saj atë natë (15 korrik) dhe do të vazhdojë ta dëshmojë luftën e saj në periudhën e ardhshme.
Erdogan u tha qytetarëve dhe publikut të mbledhur se, “në kohën e ristrukturimit të qendrave politike dhe ekonomike të pushtetit, nuk do t’u japë mundësi atyre që duan të nxjerrin jashtë loje vendin e tij”. /tesheshi.com/
