Presidenti turk Recep Tayyip Erdogan, ka bërë të ditur se disa refugjatëve sirianë dhe irakianë që kalojnë një proces të shqyrtimi do t’u jepet shtetësia turke.
Në një fjalim të transmetuar në televizion, Erdogan tha se do të kryhen kontrollet e sigurisë për të përcaktuar se kush është i përshtatshëm për shtetësi, në mesin e miliona njerëzve të cilët u larguan nga vendet e tyre të përfshira nga lufta.
“Ministria jonë e Brendshme është duke kryer punën e saj, dhe në bazë të kësaj pune, një numri të konsiderueshëm prej tyre do t’u jepet shtetësia jonë pasi të jenë kryer të gjitha kontrollet e nevojshme,” tha ai.
“Ka njerëz të kualifikuar në mesin e tyre, si inxhinierë, avokatë, mjekë. Le ta shfrytëzojmë këtë talent dhe këtë potencial … Në vend që ata të punojnë në mënyrë të paligjshme këtu dhe atje, le t’u japim atyre mundësinë për të punuar si qytetarë, si fëmijët e këtij kombi. ”
Erdogan shtoi se ministria e Brendshme “është e gatshme për zbatimin e kësaj masë në çdo kohë”. Por ai nuk dha detaje të tjera, sidomos sa vetë do të fitojnë shtetësinë turke.
Sipas shifrave të qeverisë turke, vendi është pritës për më shumë se tre milionë sirianë dhe irakenë të cilët janë larguar nga konflikti.
Udhëheqësi turk paraqiti një plan të natyralizimit verën e kaluar, por ideja u prit me protesta të zemëruara dhe komente ksenofobe në mediat sociale.
Opozita politike e vendit e pa planin si një skemë për të zgjeruar bazën zgjedhore të Erdoganit, në një kohë kur ai po bën presion për reformë kushtetuese me qëllim që të forcojë pushtetin e tij.
