Presidenti turk Rexhep Tajip Erdogan, u bëri thirrje Shteteve të Bashkuara dhe vendeve evropiane që së bashku të hapin arkivat për ngjarjet e vitit 1915 dhe tha se Presidenti i SHBA Joe Biden përdori deklarata të pabazuara dhe joreale mbi ccështjen armene.
Të hënën, pas një takimi kabineti në kompleksin presidencial në Ankara, Erdogan preku deklaratën e Presidentit të SHBA Joe Biden rreth ngjarjeve të 1915.
“Presidenti i SHBA Biden ka përdorur deklarata të pabazuara, të padrejta dhe joreale në lidhje me ngjarje të dhimbshme më shumë se një shekull më parë,” tha Erdogan.
Ai nënvizoi se “nuk ka asnjë provë konkrete ose vendim të gjykatave ndërkombëtare” për pretendimet armene.
“Hulumtimi i ngjarjeve historike dhe zbulimi i së vërtetës duhet t’u lihet historianëve, jo politikanëve. Oferta jonë për të formuar një komision të përbashkët të historisë për t’u marrë me pretendimet armene është ende pa përgjigje,” tha Erdogan.
Presidenti turk shtoi se deklaratat e Biden u bënë nën presion nga qarqet radikale armene dhe grupet anti-turke.
“Nëse po flisni për gjenocid, atëherë qëndroni para një pasqyre dhe vlerësoni situatën,” tha Erodgan.
Me këtë rast, ai u bëri thirrje Shteteve të Bashkuara dhe vendeve të Evropës që “së bashku të hapin arkiva për ngjarjet e vitit 1915”.
“Ka shumë varre masive të turqve që u masakruan nga armenët, por ju nuk do të gjeni askund varre masive që u përkasin armenëve. Perandoria Osmane nuk e dëboi popullsinë armene, por e zhvendosi atë brenda vendit të tyre,” shtoi Erdogan. Ai theksoi se Amerika dhe vendet evropiane jo vetëm që tregojnë armiqësi ndaj Turqisë, por gjithashtu tradhtojnë shkencën duke marrë anën e mashtrimeve, shpifjeve dhe gënjeshtrave të atyre që ikin nga bisedat bazuar në dokumentet arkivore historike. /tesheshi.com/
