Presidenti i Turqisë, Rexhep Tajip Erdogan do të nisë udhëtimin e tij dy-ditor në vendet e Gjirit, në një përpjekje për të ndihmuar në zgjidhjen e mosmarrëveshjes midis Katarit dhe katër shteteve të tjera arabe.
Erdogan pritet të arrijë të dielën në portin Jeddah të Arabisë Saudite, për një takim me mbretin Salman dhe princin e kurorës Mohammed bin Salman, njofton zyra e tij.
Ai pastaj do të niset për Kuvajt, ndërmjetësin kryesor në krizën e Gjirit, dhe më vonë drejt Katarit.
“Ne do të punojmë deri në fund për zgjidhjen e mosmarrëveshjes midis kombeve vëllazër të rajonit”, tha ai në komentet pas faljes së namazit të xhumasë.
“Problemet politike janë të përkohshme, ndërsa lidhjet ekonomike janë të përhershme dhe pres që investitorët nga vendet e Gjirit të zgjedhin lidhjet afatgjata”, shtoi më tej lideri turk.
Turqia e ka mbështetur fort Katarin, pasi që Arabia Saudite, Emiratet e Bashkuara Arabe, Bahreini dhe Egjipti ndërprenë lidhjet dhe vendosën bllokadën ajrore, detare dhe tokësore ndaj këtij vendi muajin e kaluar.
Ata gjithashtu parashtruan një listë me 13 kërkesa që përfshinin mbylljen e një baze ushtarake turke të sapohapur.
Erdogan ka thënë se kërkesat janë të paligjshme dhe ka bërë thirrje për t’i dhënë fund krizës, duke përmendur nevojën për solidaritet ndër-musliman dhe lidhje të forta tregtare në rajon.
Mosmarrëveshja deri tani është dëshmuar të jetë e komplikuar dhe Erdogan ka thënë se Arabia Saudite duhet të zgjidhë krizën.
Të premten, Emiri Sheikh Tamim bin Hamad Al Thani bëri thirrje për dialog me qëllim të zgjidhjes së krizës, por theksoi se bisedimet, e çfarëdo natyre të jenë, duhet të respektojnë sovranitetin e vendit të tij. /tesheshi.com/
