Ukraina duhet “padyshim” të përfshihet në negociatat për t’i dhënë fund luftës me Rusinë, theksoi presidenti turk Rexhep Tajip Erdogan.
“Ne shohim që po krijohet një ekuacion i ri. Për të pasur rezultate me këtë proces të ri, Ukraina duhet patjetër të përfshihet dhe kjo luftë duhet të ndalet përmes negociatave që do të zhvillohen me marrëveshje të ndërsjellë,” tha Erdogan.
Javën e kaluar, presidenti amerikan Donald Trump minimizoi rëndësinë e pjesëmarrjes së Ukrainës në negociata.
“Ne mirëpresim vullnetin e zotit Trump për të ndalur luftën përmes negociatave, por rruga për një paqe të drejtë dhe të qëndrueshme mund të hapet vetëm me një ekuacion në të cilin përfaqësohen të gjitha palët e interesuara”, theksoi presidenti turk, i cili priti në Ankara ministrin e Jashtëm rus.
Erdogan kishte deklaruar tashmë, në një video-mesazh të transmetuar në Kiev përpara samitit ndërkombëtar, në shënimin e tre viteve të luftës, se Kievi dhe Moska duhet të përfaqësohen “në mënyrë të barabartë dhe të drejtë”.
“Vetëm Turqia mund ta shpëtojë Bashkimin Evropian nga ngërçi në të cilin ka rënë,” tha gjithashtu Erdogan.
Presidenti turk përshkroi një pamje të zymtë për Evropën, të theksuar nga rritja e forcave të ekstremit të djathtë në zgjedhje, duke thënë konkretisht: “Për fat të keq, zgjedhjet e fundit dëshmuan se shqetësimet tona ishin të justifikuara. Një nga arsyet për këtë është paaftësia e forcave politike qendrore të Evropës për të lexuar drejt frymën e kohës. Demokracia liberale, e cila ishte tërheqëse në shekullin e kaluar, ka hyrë në një krizë dhe ngërç të rëndë. Demokracia liberale ka humbur fuqinë, prestigjin dhe ndikimin e saj të mëparshëm”.
Tajip Erdogan vuri në dukje se “ashtu si jeta, politika nuk pranon një vakum” dhe “siç u tregua në zgjedhjet e fundit, vakumi në demokracitë evropiane po mbushet nga demagogë të ekstremit të djathtë”. Kësaj situate, në të cilën ai pretendoi se është gjetur Perëndimi, presidenti turk i shtoi “qëndrimin e paqartë”, siç tha ai, “qëndrimin e Perëndimit ndaj gjenocidit 471-ditor në Gaza”, duke akuzuar organizatat dhe liderët perëndimorë “të cilët ishin dëshmitarë të masakrës së më shumë se 61 mijë civilëve, kryesisht fëmijë dhe gra”, për dështimin e “provimit të njerëzimit” në Gaza.
“Me këto zhvillime është bërë e qartë se vlerat perëndimore, të cilat për vite me radhë janë paraqitur si shembull për pjesën tjetër të botës, janë larg synimit të së mirës së përbashkët për njerëzimin”, shtoi presidenti turk.
Sipas Rexhep Tajip Erdogan, “nuk është e mundur të rikuperohet humbja e reputacionit dhe besimit në një kohë të shkurtër”.
“Përballë këtij imazhi, – vazhdoi ai, – ajo që ka më shumë rëndësi për ne është mbrojtja e interesave tona. Gjithashtu, ne i kushtojmë rëndësi të madhe paqes dhe mirëqenies së qytetarëve tanë që kanë jetuar në Evropë për katër dhe pesë breza. Ne po monitorojmë nga afër zhvillimet për të siguruar që prania e së djathtës ekstreme të mos përbëjë kërcënim për turqit dhe myslimanët evropianë”.
Pas gjithë kësaj, Rexhep Tajip Erdogan argumentoi se “zhvillimet në Siri si dhe diskutimet në kontekstin e luftës në Ukrainë konfirmojnë nevojën e Evropës për Turqinë” dhe përfundoi: “Vetëm Turqia mund ta shpëtojë Bashkimin Evropian nga ngërçi në të cilin është gjetur, nga ekonomia te mbrojtja, nga politika te reputacioni ndërkombëtar. Anëtarësimi i plotë i Turqisë në Union mund ta shpëtojë atë. Është Turqia, anëtarësimi i plotë i së cilës do t’i japë jetë Evropës, ekonomia dhe struktura demografike e së cilës po bien me shpejtësi. Sa më shpejt që Bashkimi Evropian të përballet me këto realitete, aq më mirë për të. Ne, si gjithmonë, dëshirojmë të avancojmë procesin tonë të anëtarësimit mbi bazën e përfitimit dhe respektit reciprok me mirëkuptim konstruktiv”. /tesheshi.com/
