Presidenti turk Rexhep Tajip Erdogan në prag të vizitës në Francë tha në një intervistë televizive TF1 dhe LCI të Francës, se marrëdhëniet midis Ankarasë dhe Parisit, si dhe midis Turqisë dhe Bashkimit Evropian (BE) kanë hyrë në një fazë të re, duke përmendur shpresën e madhe që ai ka në presidentin francez Emmanuel Macron.
“Ne kemi hyrë në një fazë të re të marrëdhënieve me presidentin Macron, me të cilin kemi bërë një fillim të mbarë. Hapat që kemi ndërmarrë së bashku, në kontekstin e çështjeve rajonale si dhe marrëdhëniet dypalëshe po zhvillohen në drejtimin e duhur. Kemi edhe marrëdhënie trilaterale mes Francës, Italisë dhe Turqisë, sidomos në fushën e industrisë së mobiljeve. Mendoj se kjo është e rëndësishme edhe në kontekst të solidaritetit të këtyre trija vendeve”, tha Erdogan.
Ai theksoi se vizita e ardhshme në Francë do të kontribuonte më tej në zhvillimin e marrëdhënieve midis dy vendeve. “Franca dhe Turqia do të ndërmarrin shumë hapa të rëndësishëm në aspektin politik, strategjik dhe ekonomik”, tha presidenti i Turqisë.
Ai theksoi se gjatë takimit me Macron do të bëhet fjalë edhe për çështje të sigurisë, duke shtuar se Turqia do të vazhdojë të bëjë përpjekje të mëdha për të parandaluar shkuarjen e luftëtarëve të huaj në Siri. Ai kujtoi se si Franca ashtu edhe Turqia kërkojnë largimin e presidentit sirian Bashar al-Assad nga qeveria për të vendosur paqen në atë vend.
Në fund, ai gjithashtu foli edhe për marrëdhëniet me Uashingtonin, duke shtuar se Shtetet e Bashkuara u dërgojnë armë disa organizatave terroriste në Siri. “SHBA është partneri ynë strategjik, por në Siri ata janë me PKK, PYD dhe YPJ. Ata kanë mbështetjen e SHBA-ve”. Shtetet e Bashkuara kanë dërguar gati tre mijë armë, automjete të blinduara dhe tanke këtyre organizatave terroriste. Gjitha këto ia kam thënë presidentit Trump. Por, për fat të keq, nuk kemi pasur ndonjë rezultat, dhe ushtarët amerikanë edhe sot e kësaj dite mund të shihen përkrah terroristëve. Flamuri i Shteteve të Bashkuara valon pranë flamurit të organizatave terroriste. Gjitha këto gjëra janë të papranueshme për ne”, tha Erdogan.
Erdogan zhvillon sot një vizitë zyrtare në Francë. /tesheshi.com/
