Presidenti i Turqisë, Rexhep Tajip Erdogan, pas takimit me presidentin francez Emmanuel Macron në Paris, komentoi procesin e anëtarësimit të vendit të tij në Bashkimin Evropian duke thënë se Turqia nuk ka ndërmend ta lusë atë se “a do të na pranoni më në fund”.
“Ashtu siç na shqetëson neve kjo punë (procesi i anëtarësimit në BE), i shqetëson edhe qytetarët tanë. Kjo mund të na çojë në një vendim të caktuar, por nuk kemi ndërmend të themi vazhdimisht ‘a do të na pranoni më në fund’”, porositi Erdogan.
Turqia aplikoi për anëtarësim në Bashkësinë Ekonomike Evropiane, një pararendëse e BE-së, në vitin 1987.
Ajo u bë e përshtatshme për anëtarësimin në BE në vitin 1997, dhe bisedimet për pranim filluan në vitin 2005. Për të fituar anëtarësimin, Turqia duhet të përfundojë me sukses negociatat me BE në 35 kapituj politikë, që përfshijnë reforma dhe miratimin e standardeve evropiane.
Më parë, nënsekretariati i Turqisë për industrinë e mbrojtjes dhe EUROSAM-i franko-italian, nënshkruan një marrëveshje të sistemit të mbrojtjes kundër raketave.
Presidenti turk tha se nënshkrimi i marrëveshjes së mbrojtjes ishte hap shumë i rëndësishëm. /tesheshi.com/
