Presidenti turk Rexhep Tajip Erdogan tha të martën se mbajtja e zgjedhjeve të përgjithshme të ardhshme në Bosnje pa probleme dhe progres në procesin e dialogut Kosovë-Serbi do të kontribuojë në stabilitetin e rajonit.
Në Asamblenë e Përgjithshme të Kombeve të Bashkuara në Neë York, ai foli për një sërë temash, ndër të cilat ishte situata në rajonin e Ballkanit Perëndimor.
“Ne po bëjmë përpjekje intensive në platformat dypalëshe dhe shumëpalëshe për të forcuar paqen dhe stabilitetin në Ballkan dhe për të zgjidhur keqkuptimet përmes dialogut”, tha Erdogan.
Presidenti turk kujtoi se në fillim të shtatorit ishte në një turne rajonal, gjatë të cilit vizitoi Bosnjen, Serbinë dhe Kroacinë.
“Mbajtja e zgjedhjeve në Bosnjë pa probleme dhe progres në procesin e dialogut ndërmjet Kosovës dhe Serbisë do të kontribuojë në stabilitetin e rajonit”, tha Erdogan.
Ai tha gjithashtu se Turqia thekson rolin kyç të dialogut dhe diplomacisë në uljen e tensioneve midis Rusisë dhe Ukrainës.
Ai i bëri thirrje komunitetit ndërkombëtar që të mbështesë sinqerisht përpjekjet për paqe të qëndrueshme midis Rusisë dhe Ukrainës.
Ai nënvizoi se Turqia kërkon të zgjidhë konfliktet me ndërmjetësim.
“Ne do të vazhdojmë të intensifikojmë përpjekjet tona për t’i dhënë fund luftës së furishme në bazë të integritetit territorial dhe pavarësisë së Ukrainës,” tha Erdogan.
“Së bashku ne duhet të gjejmë një zgjidhje diplomatike të arsyeshme, të drejtë dhe të qëndrueshme, e cila do t’i lejojë të dyja palët të dalin me dinjitet nga kriza”, theksoi lideri turk.
Fokusi i fjalimit të Erdogan ishte dhe çështja palestineze.
“Nuk ka asnjë mundësi për një zgjidhje të drejtë, të qëndrueshme dhe gjithëpërfshirëse pa krijimin e një shteti të pavarur dhe sovran palestinez, me Kudsin Lindor (Jerusalemin) si kryeqytet.”
Ai gjithashtu preku tensionet dhe konfliktet aktuale midis Armenisë dhe Azerbajxhanit.
“Ne besojmë në mundësinë e nënshkrimit së shpejti të një marrëveshjeje gjithëpërfshirëse paqeje midis Azerbajxhanit dhe Armenisë,” tha Erdogan.
Por nga ana tjetër, Erdogan ka qenë i ashpër me Greqinë.
Ai akuzoi fqinjin perëndimor për krime kundër njerëzimit në rastin e emigrantëve dhe refugjatëve.
“Ne nuk duam të shohim më shumë foshnja të vdekura si Aylan të dalin në brigjet tona,” tha ai, duke i atribuuar Greqisë tragjedi detare.
Sa për fërkimet në lidhje me pretendimet në Egje, Erdogan tha se “në Egje dhe në Mesdheun Lindor ne duam që gjithçka të zgjidhet në bazë të rregullave të fqinjësisë së mirë dhe në bazë të ligjit ndërkombëtar. Në Mesdheun lindor, ruajtja e paqes varet nga respektimi i të drejtave të të gjitha palëve.
Greqia duhet të lërë mënjanë sfidat dhe përshkallëzimin dhe t’i përgjigjet thirrjeve tona për solidaritet dhe bashkëpunim”. /tesheshi.com/
