Muslimanët, të cilët përbëjnë një të katërtën e popullsisë së botës, duhet të përfaqësohen në proceset globale të vendimmarrjes në mënyrën që e meritojnë, tha presidenti turk Rexhep Tajip Erdogan, transmeton Anadolu.
Ai theksoi domosdoshmërinë absolute për të pasur një vend islam me të drejtë vetoje në Këshillin e Sigurimit të Kombeve të Bashkuara.
Presidenti turk e ka theksuar këtë gjatë viteve të fundit si pjesë e nismës së tij “Bota është më e madhe se pesë”, duke synuar pesë anëtarët e përhershëm të Këshillit të Sigurimit të OKB-së me të drejtën ekskluzive të vetos.
“Të kesh një vend të tillë me të drejtë vetoje në Këshillin e Sigurimit të OKB-së nuk është më thjesht një domosdoshmëri, por një imperativ”, tha Erdogan.
Siguria e Evropës pa Turqinë është e paimagjinueshme, tha presidenti turk.
Shteti i Pavarur Palestinez
“Turqia e sheh procesin e saj të anëtarësimit në Bashkimin Evropian si një prioritet strategjik, sepse është pjesë e pandashme e Evropës”, tha Erdogan, duke shtuar: “Është duke u bërë e pamundur që Evropa të vazhdojë si një aktor global pa zënë vendin që i takon Turqisë”.
Presidenti turk ka komentuar edhe zhvillimet në Lindjen e Mesme.
“Izraeli nuk do të gjejë paqen që kërkon pa krijuar një shtet të pavarur palestinez me integritet territorial të bazuar në kufijtë e vitit 1967”, paralajmëroi ai.
Ai kritikoi ashpër si retorikën ashtu edhe kërcënimet e zyrtarëve izraelitë, të cilat përkeqësojnë më tej tensionet.
Nuk ka vend për terrorizëm
“Sikur të mos mjaftonin thirrjet e tyre për aneksimin e Bregut Perëndimor, ministrat e qeverisë izraelite po luajnë me zjarrin me provokimet që synojnë xhaminë Al-Aksa”, tha Erdogan.
Ai përsëriti qëndrimin tashmë të njohur se xhamia historike në Jerusalem është një vijë e kuqe për Turqinë.
Erdogan komentoi gjithashtu përpjekjet në kontekstin e tranzicionit politik dhe rindërtimit të Sirisë së shkatërruar nga lufta.
“Ata që duan të shfrytëzojnë paqëndrueshmërinë e Sirisë duke provokuar përkatësinë etnike dhe fetare, duhet ta dinë se nuk do të jenë në gjendje të arrijnë qëllimet e tyre”, tha Erdogan.
Ai tha gjithashtu se të gjithë duhet ta dinë se nuk do të ketë vend për terrorizëm në Turqi dhe rajonin e saj. /tesheshi.com/
