Presidenti turk Rexhep Tajip Erdogan tha pas takimit me presidentin rus Vladimir Putin se të dy vendet diskutuan bashkëpunimin në fushën e industrisë së mbrojtjes, si dhe çështje të tjera rajonale dhe globale.
“Ne duam të vazhdojmë solidaritetin tonë me Rusinë në shumë fusha të industrisë së mbrojtjes. Kjo mund të vlejë si për avionët e pasagjerëve ashtu edhe për ato luftarakë. Gjithçka është në frymën e solidaritetit”, tha Erdogan në një konferencë shtypi pas takimit me Putinin në Moskë.
Ai theksoi se Turqia është e gatshme të bashkëpunojë në formatin “Astana” për të siguruar përfundimisht paqen në Idlibin sirian.
“Idlibi sirian, ku më shumë se 500 civilë janë vrarë që nga maji, po përballet me një krizë humanitare. Eshtë e papranueshme që në Idlib, regjimi, me pretekstin e luftimit të terrorizmit, po vret civilë nga toka dhe nga ajri”, tha Erdogan.
Ai përsëriti se Turqia mbështet fuqimisht integritetin territorial të Sirisë dhe synon t’i japë fund gjakderdhjes.
Nga ana tjetër, Putin tha se marrëdhëniet Rusi-Turqi po zhvillohen në bazë të miqësisë, respektit reciprok dhe interesit.
“Ne mund të kryejmë aktivitete të përbashkëta me avionët Su-35. Mund të bashkëpunohet edhe me Su-57. Ka mundësi të shumta në këtë drejtim”, tha Putin.
Ai gjithashtu theksoi se ishte arritur një marrëveshje në një takim në Moskë për të larguar terroristët nga Idlibi sirian.
“Ne kemi arritur një marrëveshje me presidentin turk për atë që duhet të bëhet për të eleminuar terroristët nga Idlibi”, tha Putin, duke shtuar se formati ”Astana” në Siri ishte “shumë i dobishëm”.
“Ne i kuptojmë shumë mirë shqetësimet e Turqisë. Është e nevojshme të garantohet siguria e kufijve të saj, kjo është një e drejtë legjitime e Turqisë ”, tha presidenti rus. /tesheshi.com/
