Vizita e parë në Greqi e një kryetari të shtetit turk në 65 vitet e fundit ka nisur me shkëmbim replikash.
Në konferencën e përbashkët për shtyp mes dy presidentëve, Prokopis Pavlopulos dhe Recep Taip Erdogan nuk kanë munguar përplasjet e hershme mes dy vendeve. Presidenti turk e cilësoi si të vjetëruar Traktatin e Lozanës dhe ofroi ose përditësimin e tij dhe përshtatjen me kohën, ose nënshkrimin e një marrëveshjeje të re mes Athinës dhe Ankarasë.
“Në marrëveshjen e Lozanës shkruhet qartë se minoriteti në Trakë është turk dhe jo mysliman. Këtë qëndrim e ka mbrojtur edhe Gjykata Ndërkombëtare, por asnjëhere nuk është njohur dhe trajtuar si i tillë nga Athina”, u shpreh ai.
Por, presidenti grek, Prokopis Pavlopulos ka qenë i prerë duke deklaruar se traktati i Lozanës nuk preket, ndërsa bëri thirrje për më shumë bashkëpunim mes dy vendeve dhe shprehu gatishmërinë që Greqia të jetë porta hyrëse e Turqisë për në BE.
“Duhet të kemi respekt për të drejtën ndërkombëtar, siç edhe respekt për standardet e arritura europiane. Respektimi i Traktatit të Lozanës është zgjidhja e vetme për paqen në rajon”, tha Pavlopulos.
Mes dy vendeve qëndrojnë vite të gjata armiqësie që kanë të bëjnë edhe me çështje të tjera si ajo e Qipros, ku nuk ka ende marrëveshje për paqen, dhe për bllokimin e ekstradimit të 8 ushtarëve turq që akuzohen nga Ankaraja si pjesëtarë të grushtit të dështuar të shtetit.
Vizita e Erdogan në Greqi po shoqërohet me masa të forta sigurie, ku janë angazhuar më shumë se 3 mijë policisë. /tesheshi.com/
