Ndërsa operacioni i ushtrisë turke ka hyrë në ditën e tretë, Presidenti Erdogan deklaroi se ai do të vazhdojë pa u ndalur.
“Ne jemi të vendosur për ta mposhtur terrorizmin në Afrin. Ne nuk tërhiqemi dhe kemi një marrëveshje për këtë me miqtë rusë”, tha Erdogan në një takim që u transmetua live në television.
Erdogan konfirmoi se Turqia ka folur me fuqitë e tjera botërore, duke përfshirë SHBA-në në lidhje me këtë operacion, por shtoi: “Ne nuk arritëm ta bindim SHBA-në për disa gjëra”, por nuk dha detaje të tjera.“Ne si Turqi nuk kemi synimin për të pushtuar askënd, kemi vetëm një qëllim, të fitojmë zemrat”, tha Erdogan.
Presidenti turk tha se ka një padurim nga ana e disa zyrtarëve amerikanë për atë se sa do zgjasë operacioni dhe si do të zhvillohet.
“Ne do të vazhdojmë operacionin deri sa ë arrihet qëllimi përfundimtar që të mposhtim terroristët. A nuk po e bën këtë edhe SHBA në Irak dhe Afganistan?”, deklaroi presidenti turk, duke shtuar se vetëm ai dhe krerët e ushtrisë e dinë dhe e vendosin se kur të përfundojnë operacionin.
“Nuk ka matematikë në një luftë, gjithçka varet nga rrethanat. Ne nuk tërhiqemi”, shtoi Erdogan, duke i dhënë përgjigje edhe pikëpyetjeve të mediave ndërkombëtare në lidhje me sjelljen e ushtarakëve turq në kufirin me Sirin.
Siç bën të ditur Daily Sabah, prej tre ditësh ushtria turke ka nisur një operacion në shkallë të gjerë të emërtuar “Dega e Ullirit”, në veriperëndim të Sirisë, përkatësisht në zonën e Afrinit, për të pastruar zonën nga grupe që i cilëson terroriste si PKK dhe bashkëpunëtorët e saj: KCK, PYD, YPG; dhe DAESH (ISIS).
Operacioni ka nisur me bombardimin e artilerisë raketore, pas fotografimit nga aeroplanët të objekteve që mbajnë trupat kurde.
Tani pritet që të futet kembësoria që të marrë në dorë të gjithë territorin, pasi ta ketë pastruar nga objektivat dhe arsenalet ushtarake që konsideron kundërshtare. /tesheshi.com/
