Eksperti turk i “gjuhës së trupit”, Murat Ertan komentoi lëvizjet e presidentit Tajip Erdogan dhe kryeministrit grek Kyriakos Mitsotakis gjatë një takimi të dielën e kaluar në Stamboll, ku ata drekuan së bashku, si të ishin miq për kokë, në brigjet e Bosforit.
Duke shpjeguar “gjuhën e trupit” dhe duke parë video nga takimi i dy liderëve, Ertan komentoi se mes Erdogan dhe Mitsotakis ka “afërsi, ndershmëri, dashuri dhe buzëqeshje” dhe imazhi i tyre tregon “miq të vjetër” dhe jo rivalë.
“Shikoni këtë video ne mund të shohim mesazhet e miqësisë: ka afërsi, ka sinqeritet, dashuri dhe buzëqeshje. Është si të takosh dy miq. Ato tensione që kemi përjetuar prej kohësh në Mesdhe nuk ekzistojnë dhe në vend të tyre duket sikur shohim një mesazh nga liderët e dy vendeve me miqësi afatgjatë. Kujdes, këtë e shohim edhe te presidenti ynë”, tha ai konkretisht.
Kujtojmë se media greke po i bën jehonë të madhe drekës të së dielës, ku Mitsotakis ishte në Stamboll për një kremtim ortodoks në Patriarkanë, e në këtë rrethanë u ftua për drekim nga Erdogan.
Nën tmerrin e një lufte në Ukrainë, politika e opinioni grek po përcjellin frymën e shuarjes së armiqësisë me fqinjin lindor. /tesheshi.com/
