Presidenti turk paralajmëroi sërish Greqinë për atë që Ankaraja pretendon se po bën fqinji helen, duke militarizuar ishujt pranë brigjeve turke, në shkelje kjo të Marrëveshjes së Lozanës. Nga parlamenti, Erdogan këshilloi Greqinë “të qëndrojë larg provokimeve që do të çojnë në katastrofë për të dhe popullin e saj”.
“Askush nuk mund ta kufizojë horizontin e Turqisë në 780,000 kilometra katrorë,” tha presidenti turk.
“Arsyetimi i Greqisë, i cili militarizon ishujt e Egjeut, është i papajtueshëm me logjikën e aleancës. Ne e dimë shumë mirë se kush pas 100 vitesh na ka lëshuar sërish Greqinë. Në çdo rast themi se e dimë lojën që po tentohet të luhet në këtë mënyrë. Ne këshillojmë administratën greke të qëndrojë larg provokimeve që do të çojnë në katastrofë për veten dhe popullin e saj”, vazhdoi Erdogan, duke lëshuar kërcënime të reja kundër Greqisë.
Erdogan iu përgjigj gjithashtu kritikave për pjesëmarrjen e tij në një samit, së bashku me liderët e Rusisë dhe Kinës, duke thënë se “disa qarqe po përpiqen të paraqesin nismat tona të politikës së jashtme si një zhvendosje nga boshti ynë. Bëhet fjalë për forcimin e boshtit tonë, në të njëjtën kohë kryerjen e marrëdhënieve të ndryshme diplomatike mbi bazën e interesave tona kombëtare”.
“Me krenari deklaroj se diplomacia turke po kalon një nga periudhat e saj më të suksesshme në dekadat e fundit. Qasja jonë ndaj krizës ukrainase është shembulli i fundit i politikës sonë të jashtme që ka në qendër paqen, stabilitetin dhe popullin”, tha presidenti turk. /tesheshi.com/
