Presidenti turk Rexhep Tajip Erdogan po udhëton për në Ukrainë të enjten, pasi propozoi që Ankaraja të jetë ndërmjetëse në qetësimin e tensioneve me Rusinë, pa mbajtur anën.
Një zyrtar turk i tha Reuters se Ankaraja pret që tensionet të zbuten pas një takimi në Kiev me presidentin Volodymyr Zelensky. Ankaraja dhe Kievi njoftuan një ditë më parë se do të nënshkruajnë disa marrëveshje, përfshirë atë për tregtinë e lirë.
Rusia hedh poshtë pretendimet perëndimore se po planifikon një pushtim të Ukrainës dhe kërkon garanci sigurie që NATO nuk do të zgjerohet më tej në lindje ose nuk do të instalojë sisteme raketore në Ukrainë.
Kievi dhe Moska, të hapura ndaj idesë
Vizita e Erdoganit vjen pasi liderët e anëtarëve të NATO-s të Britanisë së Madhe, Polonisë dhe Holandës vizituan Kievin. Turqia ka marrëdhënie të mira me Ukrainën dhe Rusinë, por tha se si anëtare e NATO-s, do të bëjë atë që është e nevojshme nëse Rusia sulmon.
Ankaraja ofroi të ndërmjetësonte në nëntor dhe burimet diplomatike turke zbuluan muajin e kaluar se si Kievi dhe Moska janë të hapur ndaj kësaj ideje.
Një tjetër zyrtar turk, duke folur në kushte anonimiteti, tha se Erdogan do t’u bënte thirrje të dy palëve të tregojnë përmbajtje, duke shtuar se Ankaraja dëshiron të vazhdojë bashkëpunimin me të dy vendet “shumë të rëndësishme”.
Turqia i shet Ukrainës drone të sofistikuar ushtarake
Qasja e Turqisë nuk po “merr një anë”, tha zyrtari.
“Me iniciativën e Erdoganit dhe me mesazhet që do të dërgojë presim që tensionet të qetësohen”, përfundoi ai.
Turqia ndan Detin e Zi me Ukrainën dhe Rusinë. Erdogan tha se një konflikt në rajon do të ishte i papranueshëm dhe paralajmëroi Rusinë se një pushtim nuk do të ishte një veprim i mençur.
Edhe pse po ndërton bashkëpunim në fushën e energjisë dhe mbrojtjes me Rusinë, Turqia kundërshtoi politikën e Moskës në Siri dhe Libi, si dhe aneksimin e Krimesë nga Rusia në vitin 2014. Së fundi, Turqia i ka shitur Ukrainës drone të sofistikuar ushtarake. /tesheshi.com/
