Presidenti i Serbisë, Aleksandër Vuçiç është zotuar para homologut të tij turk, Rexhep Tajip Erdogan dhe atij boshnjak, Bakir Izetbegoviç se Beogradi do të respektojë integritetin e Bosnjë-Hercegovinës.
Siç bën të ditur B92, Erdogan është takuar në selinë e tij në Dollma Bahçe në Stamboll, me Vuçiç dhe Izetbegoviç, në një nismë për të normalizuar marrëdhëniet ndërmjet Sarajevës dhe Beogradit.
“Atë që ne bëjmë në respektimin e integritetit tuaj territorial, duam që edhe ata të njohin integritetin e Republika Srbska”, tha Vuçiç pasi ka dalë nga takimi.
Pak kohë më parë në Stamboll ka qenë edhe Presidentja e Kroacisë, Kolinda Grabar Kitaroviç.
Gazetarët e kanë pyetur Vuçiçin se a po kontribuon Erdogan në relaksimin e marrëdhënieve në Ballkan.
Presidenti serb ka vlerësuar rolin e homologut turk dhe tha se “shpreh mirënjohjen për mesazhin që zoti Erdogan shpërndau në Novi Pazar, i cili ishte krejt i ndryshëm nga ai që u dha 7 apo 8 vjet më parë”.
Presidenti i Republika Srbska, Milorad Dodik e ka kritikuar Vuçiçin për pjesëmarrjen në takimin e Stambollit pasi sipas tij “nuk duhet të ishte vetëm një anëtar i presidencës boshnjake”.
Vuçiç tha se nuk preferonte të hapte polemika për gjëra kaq delikate.
“Unë nuk mora asnjë vendim. Thjesht biseduam dhe nga biseda nuk vjen asgjë e keqe, përkundrazi. Për gjëra të tilla delikate është kollaj të gjesh problem dhe të kritikosh. Në duhet të jemi të mençur dhe të përfshihemi si faktor në rrjedhat botërore”, tha Vuçiç. /tesheshi.com/
