Turqia është e gatshme të mbështesë procesin e dialogut ndërmjet Kosovës dhe Serbisë nëse kërkohet, tha Presidenti Rexhep Tajip Erdogan të premten në mbrëmje pas një takimi me kryeministrin e Kosovës Albin Kurti në Stamboll, në një kohë kur Uashingtoni dhe Brukseli po përpiqen të normalizojnë marrëdhëniet midis Beogradit dhe Prishtinës, pas një jave tensioni.
“Turqia është e gatshme të ofrojë të gjitha llojet e mbështetjes për paqen dhe stabilitetin e rajonit tonë dhe të japë kontributin e nevojshëm nëse palët e kërkojnë këtë”, tha Erdogan në një konferencë për shtyp me kryeministrin Kurti.
Dialogu me Serbinë
Ai tha se Turqia shpreson që procesi i dialogut ndërmjet Kosovës dhe Serbisë të përfundojë në atë mënyrë që të sigurojë paqe dhe stabilitet të qëndrueshëm në rajon.
Ai ka theksuar se Turqia ka vazhduar të bëjë përpjekje që Kosova të arrijë pozitën që meriton në skenën ndërkombëtare.
“Në këtë kuptim ne mbështesim vizionin e Kosovës për anëtarësim në NATO, Këshill të Evropës dhe Bashkimin Evropian”, tha presidenti turk.
Erdogan tha gjithashtu se i kërkoi Kurtit të rrisë bashkëpunimin me Turqinë kundër aktiviteteve të organizatës FETO, të cilën Ankaraja e konsideron një grup terrorist përgjegjës për tentativën për grusht shteti të vitit 2016 në Turqi.
Turqia e njohu Kosovën më 18 shkurt 2008, një ditë pas shpalljes së pavarësisë.
Siç shkruan Andollia, Ballkani është prioritet për Turqinë jo vetëm për arsye politike, ekonomike dhe gjeografike, por edhe për shkak të lidhjeve historike, kulturore dhe njerëzore me atë rajon. /tesheshi.com/
