Presidenti turk Rexhep Tajip Erdogan kritikoi të hënën deklaratat e fundit të homologut amerikan Joe Biden për ngjarjet e vitit 1915, duke i cilësuar ato johistorike dhe të bazuara në dezinformata, transmeton AA.
“Presidenti amerikan duhet të mësojë dhe ta njohë shumë mirë historinë. Ne nuk mund ta falim këtë përpjekje për të sfiduar Turqinë në mungesë të njohurive të tilla (historike),” u tha Erdogan gazetarëve në kryeqytetin turk Ankara pas mbledhjes së qeverisë.
Siç tha ai, komentet e Biden për këtë temë, të publikuara të dielën, nuk meritojnë vëmendje sepse bazohen në “informacione të rreme”.
Erdogan tha se deklarata të tilla për ngjarjet e vitit 1915 nuk kishin asnjë ndikim në Turqi.
Kujtojmë se ngjarjet e vitit 1915 ndodhën gjatë Luftës së Parë Botërore, kur një pjesë e popullsisë armene që jetonte në Perandorinë Osmane iu bashkua rusëve që pushtuan territorin dhe u rebeluan.
Lobi armen në skenën ndërkombëtare po punon për të mbledhur mbështetje se armenët ishin viktima të “gjenocidit” në atë kohë, ndërsa Turqia beson se historianët duhet të vlerësojnë natyrën e ngjarjeve dhe shumë nuk pajtohen me qarqet pro-armene.
Ankaraja ka sugjeruar vazhdimisht formimin e një komisioni të përbashkët historianësh nga Turqia dhe Armenia, si dhe ekspertë ndërkombëtarë, për të trajtuar këtë çështje.
Turqia dhe Armenia bënë përpjekje në tetor 2009 për të normalizuar marrëdhëniet. /tesheshi.com/
