Presidenti turk Rexhep Tajip Erdogan kritikoi mungesën e reagimit nga vendet myslimane në zgjidhjen e gjenocidit aktual në Gaza, njëherësh duke akuzuar vendet perëndimore se i ofrojnë mbështetje të plotë Izraelit, raporton Anadolu.
Një samit i përbashkët urgjent i Organizatës së Bashkëpunimit Islamik (OIC) dhe Ligës Arabe po mbahet në kryeqytetin saudit Riad për të diskutuar sulmet izraelite në Rripin e Gazës dhe Liban.
Më shumë se 50 liderë të vendeve arabe dhe islame po marrin pjesë në samit, përfshirë presidentin turk Erdogan.
“Situata ka arritur në këtë nivel sepse vendet myslimane nuk arritën të reagonin, ndërsa një pjesë e vogël e vendeve perëndimore e ndihmuan Izraelin në çdo mënyrë”, tha Erdogan në fjalimin e tij në samit.
Presidenti turk tha se vendi i tij ka dërguar më shumë se 84,000 tonë ndihma në Gaza deri më tani dhe është gati të dërgojë shumë më tepër pasi të hiqen kufizimet.
Duke akuzuar Izraelin se nuk toleron as dërgimin e ndihmave humanitare në Gaza, Erdogan tha se furnizimet me ndihma kanë muaj që presin të hyjnë në Gaza nga Egjipti.
“Ne jemi të gatshëm të zbatojmë të gjitha propozimet konkrete dhe realiste që do ta bëjnë administratën e Netanyahut të ndjejë pasojat reale të pushtimit të tokës palestineze. Ne duhet të inkurajojmë sa më shumë vende të jetë e mundur që të bashkohen me çështjen që Republika e Afrikës së Jugut nisi kundër Izraelit në Gjykatën Ndërkombëtare të Drejtësisë”, tha Erdogan. /tesheshi.com/
