Presidenti turk Rexhep Tajip Erdogan, i cili është përpjekur vazhdimisht të ndërmjetësojë mes Moskës dhe Kievit, tha se mendimi i liderit rus Vladimir Putin ka ndryshuar kohët e fundit.
“Pashë që Putini është shumë më i butë dhe më i gatshëm për të negociuar për këtë temë se më parë”, u tha udhëheqësi turk gazetarëve, transmeton Sky.
Javën e kaluar, Putin i propozoi homologut të tij turk Erdogan që të krijojë një “qendër gazi” në Turqi për të eksportuar gaz në Evropë, në një kohë kur furnizimi me gaz rus në BE është ndërprerë për shkak të sanksioneve dhe rrjedhjeve nga gazsjellësi Nord Stream.
“Ne mund të shqyrtojmë mundësinë e krijimit të një qendre gazi në territorin turk për eksport në vende të tjera, veçanërisht në Evropë,” tha Putin tetë ditë më parë në një takim me Erdoganin, në periferi të një forumi rajonal në Kazakistan. Presidenti rus vlerësoi Turqinë, e cila u dëshmua se është “aktualisht rruga më e sigurt për dërgimin” e gazit rus.
Nisma e Putinit për një qendër gazi në Turqi vjen në një kohë kur furnizimet me gaz rus në Evropë janë ndërprerë në masë të madhe nga sanksionet perëndimore kundër Rusisë dhe BE-ja po shqyrton kufizimin e çmimeve të gazit për shkak të rritjes së kostove të energjisë të shkaktuar nga pushtimi i Rusisë në Ukrainë.
“Turqia aspiron të ndihmojë në ndalimin e ‘gjakderdhjes’ midis Rusisë dhe Ukrainës pavarësisht pengesave të mëdha,” tha presidenti turk javën e kaluar në një fjalim në samitin rajonal në Kazakistan.
“Qëllimi ynë është të ndihmojmë në ndalimin e gjakderdhjes sa më shpejt të jetë e mundur duke e përshpejtuar atë pavarësisht pengesave”, tha Erdogan. /tesheshi.com/
