Presidenti turk, Recep Tayyip Erdogan iu adresuar si bashkëkombas muslimanëve grekë në një fjalim jashtë protokollit që ai mbajti në shkollën komunitare muslimane Celal Bayar në qytetin verilindor Komotini.
Erdogan foli me qindra muslimanë grekë që ishin mbledhur për ta takuar në këtë shkollë pakice, duke prekur historinë e këtij minoriteti dhe të minoritetit ortodoks grek në Turqi, dhe duke iu referuar komunitetit musliman grek si “njerëz të të njëjtit komb”, të cilët “kanë pasur beteja mbijetese”.
Përpara fjalimit, pati edhe një incident kur Erdogan kërkoi një mikrofon për të adresuar turmën, mirëpo zëvendësministri i Jashtëm, Ioannis Amanatidis i cili e shoqëronte në vizitë në Traki tha se nuk kishte një të tillë pasi nuk ishte parashikuar ndonjë fjalim gjatë vizitës në shkollë. “Kjo nuk ishte ajo që kishim rënë dakord”, i tha Amanatidis, presidentit turk.
Erdogan u shfaq i turbulluar ndërsa turma priste, përpara se të gjendej një mikrofon që ai të fliste.
Incidenti dhe fjalimi i tij ka kapur titujt e shtypit grek që e ka ndjekur nga shumë afër vizitën e presidentit turk, e para e një kreu shteti turk në 65 vjet, ndërsa marrëdhëniet mes dy vendeve anëtare të NATO-s, nuk kanë qenë asnjëherë të qeta. /tesheshi.com/
