Presidenti i Turqisë, Rexhep Tajip Erdogan, ka inaguruar stadiumin e ri në Bursa i cili ka një pamje mjaft interesante, në formën e një krokodilit. Impianti ka një kapacitet prej 45 mijë shikuesish, ndërsa ngjyra e gjelbër e cila është tradicionale e skuadrës Bursaspor, dominon në të gjithë stadiumin.
Stadiumi quhet Timsah Arena dhe është një projekt i propozuar nga një kompani ndërtimi amerikane. Ideja e ka qenë që të përcjellë tek rivalët idenë e një loje në “tokën e armiqve”.
Në fjalimin e tij, presidenti Erdogan theksoi se qyteti dhe klubi i Bursa-s e kanë merituar ta kenë një impiant të tillë.
“Jam shumë i lumtur që qyteti dhe klubi i Bursa-s të kenë një stadium të tillë. Bursaspor ka një histori të begatshme në kampionatin turk të futbollit, ndaj dhe meriton që në një impiant të tillë të vazhdojë të shkruajë ende në të. Uroj që ky sukses të vijojë akoma dhe më shumë me impiantin e ri”, u shpreh presidenti turk. /tesheshi.com/
