Guri i themelit për ndërtimin e Urës Sazlidere, ura e parë në mega-projektin për ndërtimin e Kanalit të Stambollit, e cila, paralelisht me Bosforin, do të lidhë Detin Marmara me Detin e Zi, u vendos me ceremoni në Stamboll.
Gjatë hapjes, Presidenti turk Rexhep Tajip Erdogan tha se ndërtimi i Kanalit të Stambollit shihet si një projekt që do të shpëtojë të ardhmen e Stambollit.
“Sot ne jemi duke kthyer një faqe të re në historinë e zhvillimit të Republikës së Turqisë,” tha Erdogan në ceremoni.
Duke kujtuar se në vitet 1930, mesatarisht 3,000 anije lundronin në Bosfor çdo vit, Erdogan tha se numri tani ishte rritur në 45,000 dhe se vlerësohej se deri në 2050 do të ngrihej në 78,000.
“Lundrimi në çdo anije të madhe përmes Bosforit përbën një rrezik serioz për qytetin. Bosfori është skena e një frekuence shumë të lartë të lundrimit të anijeve të të gjitha kategorive nga jugu, veriu dhe lindja dhe perëndimi,” tha Erdogan.
Ai gjithashtu vuri në dukje rrezikun e paraqitur nga aksidentet e anijeve të të gjitha llojeve dhe kapaciteteve, dhe veçanërisht rrezikun që paraqet në botën ujore.
Erdogan tha se mega-projekti për ndërtimin e Kanalit të Stambollit është, ndër të tjera, i nevojshëm për ruajtjen e strukturës historike dhe kulturore të Bosforit.
Ai shtoi se gjatësia e kanalit do të jetë 45 kilometra, gjerësia e bazës së tij do të jetë së paku 275 dhe thellësia do të jetë 21 metra.
Erdogan tha se të gjitha hulumtimet tregojnë se transporti në Kanalin e Stambollit do të jetë 13 herë më i sigurt se në Bosfor.
“Qëllimi ynë është të përfundojmë Kanalin e Stambollit në gjashtë vjet dhe me një kosto afër 15 miliard dollarë,” tha Erdogan.
Ai gjithashtu tha se mega-projekti për ndërtimin e Kanalit të Stambollit do të realizohet në një mënyrë që do të jetë një nga projektet më miqësore me mjedisin, jo vetëm në Turqi, por në të gjithë botën.
Gjashtë ura do të ndërtohen përgjatë Kanalit të Stambollit, e cila do të shtrihet përgjatë pjesës evropiane të Stambollit dhe dy qytete me një popullsi prej gjysmë milioni njerëz do të ndërtohen në brigjet e saj. /tesheshi.com/
