Erdogan: Greqia, kjo shpuese varkash me emigrantë!

Presidenti turk Rexhep Tajip Erdogan, duke komentuar deklaratat e kryeministrit grek Kyriakos Mitsotakis se si “Turqia e shkaktoi krizën e refugjatëve”, tha se Greqia është një vend që shpon varka për emigrantët dhe i dërgon ata në vdekje, raporton Anadolu Agency.

Erdogan priti në Ankara kryeministrin hungarez Viktor Orban, një armik i vetëshpallur i emigrantëve të Lindjes drejt BE-së, ku pas takimit mes tyre u mbajt një konferencë e përbashkët për shtyp. Duke iu përgjigjur pyetjeve të gazetarëve, Erdogan komentoi deklaratat e kryeministrit grek Kiryakos Michotakis.

“Të thuash se kriza e refugjatëve u shkaktua nga Turqia është me të vërtetë një shprehje mosmirënjohjeje”, tha Erdogan.

Ai kujtoi se Turqia ka pritur rreth pesë milionë refugjatë në territorin e saj.

“Afro katër milionë prej tyre janë nga Siria, disa nga Iraku, Afganistani. Është mosmirënjohëse të thuash ‘problemi i refugjatëve vjen nga Turqia’ për një vend që ka pritur rreth pesë milionë refugjatë. Nuk e di se çfarë do të bëjë Greqia nëse ne hapim derën”, tha Erdogan dhe shtoi:

“Mbi të gjitha, Greqia është një vend që ka shpuar varka në detin Egje dhe Mesdhe për refugjatët, duke i dënuar ata me vdekje. Ne kemi të gjitha provat për këtë. Ju mund t’i tregoni botës këtë, ose ta mashtroni botën, por ju s’mund ta mashtroni Turqinë”.

Nga ana tjetër, kryeministri hungarez Viktor Orbán tha se Bashkimi Evropian duhet t’i japë sa më shumë mbështetje Turqisë kur bëhet fjalë për migracionin. /tesheshi.com/