Nga Pakistani, presidenti Recep Tayyip Erdogan bëri deklarata të reja në mbështetje të palestinezëve dhe kundër planit të presidentit amerikan Donald Trump për t’i larguar ata nga Gaza.
Duke folur në Forumin e Biznesit Pakistan-Turqi në Islamabad, ai tha: “Gaza i përket vëllezërve tanë nga Gaza dhe në dashtë Zoti, do të mbetet e tillë përgjithmonë. Atdheu për të cilin palestinezët sakrifikuan dhjetëra mijëra fëmijë të tyre nuk mund të negociohet. Unë sinqerisht besoj se njerëzimi, veçanërisht bota arabe dhe islame, nuk do ta lërë popullin e Gazës vetëm dhe të pambrojtur në këtë proces kritik. Ne do të vazhdojmë të bëjmë detyrën tonë në çdo fushë për të parandaluar një Nakba të re”.
Erdogan iu referua çështjes palestineze më herët, në një intervistë të përbashkët që ai dha me kryeministrin pakistanez Shahbaz Sharif. “Së bashku me Pakistanin, ne po përpiqemi të ofrojmë mbështetjen e nevojshme për çështjen e drejtë të vëllezërve tanë palestinezë në Kombet e Bashkuara, Organizatën e Bashkëpunimit Islamik dhe platforma të tjera. Ne besojmë se duhet të forcojmë qëndrimin tonë vendimtar, veçanërisht në një kohë kur ka propozime për të çrrënjosur vëllezërit tanë në Gaza nga vendlindja e tyre, gjë që është e paligjshme dhe e pandërgjegjshme”, tha presidenti turk. /tesheshi.com/
