Shtetet e Bashkuara janë shumë të shqetësuara që Turqia ka marrë sisteme ruse të mbrojtjes dhe mund të vendosë sanksione ndaj Ankarasë nëse “nuk shpëton” nga ato sisteme, tha këshilltari i Sigurisë Kombëtare të Shtëpisë së Bardhë, Robert O’Brien.
“Turqia do të ndiejë pasojat e këtyre sanksioneve”, i tha ai CBS.
Sipas Reuters-it, vërejtjet e O’Brien vijnë në prag të vizitës së Presidentit turk Rexhep Tajip Erdogan në Uashington të mërkurën, kur ai do të diskutojë me homologun Trump një numër çështjesh që shqetësojnë marrëdhëniet midis dy aleatëve të NATO-s.
Një pikë kyçe e polemikës në marrëdhëniet dy-shtetore është blerja e sistemeve ruse S-400 të Turqisë, të cilat sipas pretendimeve të SHBA-së, nuk janë në përputhje me avionët luftarakë F-35, të cilat Ankaraja gjithashtu i dëshiron në flotën e saj dhe tashmë janë porositur. /tesheshi.com/
