Presidenti turk, Rexhep Tajip Erdogan ka komentuar arrestimin në Kosovë të 6 gylenistëve, gjatë një fjalimi që po mban në konferencat e AK Parti në disa pjesë të vendit.
Sot, Erdogan foli në një mbledhje të partisë në kryeqytetin turk, Ankara.
“Së fundmi, Agjencia jonë Kombëtare e Inteligjencës, në bashkëpunim me inteligjencën e Kosovës kapën gjashtë përfaqësues të lartë të FETO-s në Ballkan; i sollën dhe ia dorëzuan organeve policore. Ne kemi thënë se ata do të ikin, kurse ne do t’i ndjekim dhe sjellim këtu me lejen e Zotit kudo që gjenden. Do të kërkojmë llogari”, tha Erdogan.
Komentet e presidentit turk vijnë një ditë pasi shërbimi sekret turk MIT kreu peracionin e kapjes së 6 anëtarëve të FETO në bashkëpunim aktiv me shërbimin sekret të Kosovës.
Ata ishin e stafit të kolegjit “Mehmet Akif Ersoy”.
Ndërkohë, ky zhvillim ka trazuar politikën kosovare. Krerët e saj, kryeministri Haradinaj dhe kryeparlamentari Veseli janë shprehur të indinjuar, edhe nga fakti se nuk janë informuar, nga shërbimet inteligjente e policia e Kosovës. /tesheshi.com/
