Presidenti turk Rexhep Tajip Erdogan fajësoi sot sanksionet kundër Rusisë për krizën energjetike në Evropë.
“Evropa korr atë që mbjell. Qëndrimi i Evropës ndaj Putinit dhe sanksionet e kanë bërë atë, duam apo s’duam, të thotë: ‘Nëse e bëni këtë, unë do ta bëj këtë’”, argumentoi kreu i shtetit turk gjatë një konference për shtyp në Ankara.
“Putini përdor të gjitha mjetet dhe armët që ka në dispozicion, kryesisht gazin natyror. Ne nuk e duam, por besoj se Evropa do të ketë probleme serioze këtë dimër”, shtoi Erdogan, duke argumentuar se Turqia nga ana e saj nuk do të ketë probleme të tilla.
Turqia mban marrëdhënie të mira me Moskën dhe Kievin. Edhe pse e ka furnizuar Kievin me avionë ushtarakë pa pilot – Bayraktar, të cilat janë bërë varrmihës të ushtrisë ruse, ajo ka refuzuar të marrë pjesë në sanksionet perëndimore të vendosura ndaj Rusisë pasi ajo nisi ofensivën e saj në Ukrainë.
Erdogan kishte njoftuar në fillim të gushtit një marrëveshje për të paguar pjesërisht në rubla për dërgesat e gazit rus në Turqi.
Sipas analistëve, marrëveshja do t’i lejojë Rusisë të vazhdojë dërgesat në Turqi përmes tubacionit të gazit Turk Stream që kalon Detin e Zi.
Në vitin 2021, Rusia siguroi rreth një të katërtën e importeve të naftës së Turqisë dhe 45% të blerjeve të saj të gazit natyror.
Kujtojmë se pas një krize mes dy vendeve pak vite më parë për shkak të një incidenti ajror, Putin dhe Erdogan u ulën dhe rivendosën paqe.
Në këtë krizë të rëndë globale, Turqia po luan karta të forta diplomatike duke mbajtur të gjallë një partneritet me Rusinë, e cila ka të gjithë Perëndimin kundër.
Dy vendet nuk kanë aleanca historike, përkundrazi, kanë armiqësi historike. Kredoja perandorake e Rusisë është zotërimi i Bosforit, me ëndrrën për të shtënë në dorë Stambollin, por që në këtë kohë të dyja po luajnë kartat e diplomacisë në shahun e lëvizjeve delikate gjeostrategjike. /tesheshi.com/
